طريقة عمل الفخدة الضاني في الفرن

العيد وصل باكلاته المعروفة اللي كل الناس لازم تعملها في العيد الكبير، طبعا من ضمن الأكلات دى الفخده الضانى اللي ليها مذاق خاص جدا، وكتير من الناس بيحبها وليها اكتر من طريقه ودلوقي هقدملكوا طريقه من الطرق الكثير للفخده، من خلال هذا المقال سوف نوضح اولا المقادير ثم طريقة العمل مباشرة ويارب تنال اعجابكم .

محتويات عمل الفخدة الضانى

١- فخدة ضانى متوسطة الحجم.

٢- عدد ٤ بصله مفرومه.

٣- عدد ٢٠ فص ثوم مفروم.

٤- عصير طماطم .

٥- ليمونه كبيره .

٦- خل (حسب الرغبه)

٧- ملح (حسب الرغبه)

٨- فلفل اسود (حسب الرغبه)

٩- ملعقه كبيره كمون (يمكن الاستغناء عنه)

١٠- بهارات لحمه اذا كانت متوفرة .

طريقة عمل الفخدة الضانى

تجيبى الفخده قبل التسويه بيوم  تشيلى منها الدهون والجلد الزائد وتغسليها كويس جدا وياريت لو تتغسل بخل، وبعدين نجيب حاجه نعمل فيها التتبيلة نخلط الطماطم بعد ضربها فى الخلاط  مع البصل المفروم فرم ناعم، والثوم المفروم، والفلفل الاسود، والكمون ،والخل، والملح، والبهارات، والليمون.

طريقة عمل الفخدة الضاني في الفرن

بسكينة نبدا نعمل فتحات فى الفخده وتكون فتحات كتيره وبعدين نحط التتبيلة اللى جهزناها ونحاول ندخل من التتبيلة فى الفتحات اللى عملناها، نجيب صينيه اللى هنسوى فيها ويفضل استخدام بايركس أو تيفال، أو سيراميك، ونحط فيها الفخده بالتتبيله ونحطها فى الثلاجة.

طريقة عمل الفخدة الضاني في الفرنطريقة عمل الفخدة الضانى بالفرن مع الأرز بالمكسرات

تانى يوم نسخن الفرن على درجة حراره ٢٠٠ وبعد ما يسخن تغطى الصينية بورق فويل عشان يحافظ على اللحمه والتتبيله من الحرق وتدخل الفرن وتخلى درجة الحرارة ١٨٠، وكل نصف ساعة نرفع ورق الفويل ونشوف الفخده، ولو حسيتى إن الميه اللى نازله من الفخده قليله زودى شوية ميه وكل ما تقل نزود ميه.

بتاخد حوالى من ساعه ونصف لساعتين عشان تستوى وممكن تزودى الخل فيها عشان تستوى اسرع  لان الخل بيفتح المسام فى اللحمه وبكده تستوى اسرع، بعد ما الفخده تستوى ممكن ترفعى ورق الفويل وتشغليلها الشوايه من خمس إلى عشر دقائق لكن لو مش بتحبى اللحمه ناشفه بلاش شوايه.

نجهز الطبق اللى هتتقدم فيه وبعد ما تخرج من الفرن نشيلها من الصينية لطبق التقديم وتزينى الطبق ببقدونس وشبت وفلفل الوان على حسب رغبتك، ممكن تتقدم مع رز بسمتي أو رز عادى وسلطة طحينه ، أو أى نوع من انواع المخللات أو بمفردها حسب رغبتك، وبالهنا والشفا اتمنى تجربوا الوصفه وتنال اعجابكم إن شاء الله، “وكل عام وانتم بخير اعاده الله علينا وعليكم بالخير واليمن والبركات” .