نجوم مصرية
منتديات نجوم مصرية منتدى التسلية والترفيه السياحة والسفر والرحلات



بالصور : شارع باب الوزير فى منطقة الدرب الاحمر - شارع عالمى كبير وعريق فى القاهرة

 

تخيل اننا عندنا شارع عالمى كبير وعريق فى القاهرة فيه كل المزارات دى واحنا منعرفش عنه حاجة !!!

الشارع ال بتكلم عليه هو شارع باب الوزير فى منطقة الدرب الاحمر .. لاء والغريب انى لما رحت الشارع دا من اسبوع عرفت ان فى اجانب بييجو من بلادهم مخصوووص عشان يزورو مزارات معينة فى الشارع دا زى مثلا الجامع العاااالمى ال اسمه الجامع الازرق .. وال كان مفاجاة ليا انا شخصيا لانى كنت اول مرة اروح هناك .

مبدئيا كدا رحنا وعملنا جولة فى الشارع دا من كتر ما انا قرئت عنه من متخصصين وعن جماله وخلينى اقولكم فى البداية ان الشارع دا لا يقل اهمية وجمالا ابدااا عن شارع المعز ومزارات شارع المعز ..

بدئنا جولتنا من عند باب زويلة خلف مديرية امن القاهرة بالضبط من جامع الصالح طلائع ادام باب زويلة والجامع دا من الجوامع الكبيرة والجميلة جدا .. بعدها على طول طلعنا اتمشينا فى شارع الدرب الاحمر ناحية سوق السلاح لقينا ادامنا على طول جامع بشبه عليه اوى مع انى اول مرة اشوفه لانه صغير وشكله مميز وهو جامع ابو حريبة .. ومع التدقيق فى تاريخه واهميته عرفت انه جامع من اهم واروع الجوامع فى مصر نظرا لجمال ودقة نقوشه واعمال الفن فيه ولذلك فهو تم اختياره ليتم وضع صورته على ورقة العملة فئة 50 جنيه مصرى .

بعدها اتحركنا على مكان تانى واحنا ماشيين فى شارع الدرب الاحمر لقينا مكتوب يافطة عليها سهم متجه لشارع جانبى على ايدينا الشمال مكتوب عليها مقام ومسجد السيدة فاطمة النبوية .. اتحركنا مع الاتجاهات رحنا لقينا جامع كبير جدااااااا ورااائع دخلنا فيه لقينا مقام كبيير شبيه بمقام السيدة نفيسة بالضبط طلع مقام سيدة من ال البيت والجامع ال عند المقام حاجة فخمة وجميلة وعتيقة جدا مليان زخارف والوان والاسقف والقباب هناك وهمية الجمال .. الحقيقة مكنتش مصدق جمال الجامع دا ابدا وقعدت فيه فترة طويله .

خرجنا من الجامع والمقام اتحركنا تانى تجاه شارع الدرب الاحمر لحد ما لقينا جامع كدا قديم جدا وعتييييق جدا جدا وللاسف مهمل ايضا .. الجامع اسمه طنبغا المردانى .. رغم انه جامع قديم ومهمل اوى الا انى مهما اتكلمت عن مدى الراحة النفسية ال حسيتها جوا محدش هيصدق وكمان عرفت ان الجامع دا برضو من الجوامع المميزة جدا لانه به اكبر تنوع اعمدة فى العالم .. يعنى جامع عالمى برضو

خرجنا من الجامع وكملنا فى شارع باب الوزير لقينا بقى شارع كدا اشبه بشارع المعز بالضبط بضخامة جوامعه وكل خطوة مزار مهم ودا بقى شارع باب الوزير ...

اول حاجة قابلناها فى الشارع ولفتت نظرنا بيت كبير جدا وعتيق مليان مشربيات ومشرفيات خشب وجميل جدا دا اسمه بيت الرزاز ودا من البيوت العتيقة اوى ال اشبه ببيت السحيمى ولكن على مساحة اكبر بكتيييير فيه ما يقارب من 300 غرفة.

بعد بيت الرزاز على طول لقينا مسجد ومجموعة ضخمة جدااااا جدا وشكلها من برا ساااحر ودى اسمها مجموعة ام السلطان شعبان والمجموعة بتضم جامع وكتاب ومدرسة وسبيل .






اتمشينا شوية كمان لحد ما لقينا بوابة ضخمة كدا وشكلها غريب ومكتوب عليها يافطة (جامع اق سنقر والشهير عالميا بالجامع الازرق ) ودا بقى ال حكايته حكاااية .. دا طلع جامع معروف ومشهور عالميا وطلع شهرته بانه ثانى اكبر مسجد فى العاااالم معمول بالقيشانى الازرق الرائع .. ولذلك هو موجود على خريطة السياحة العالمية ومعروف دوليا .. ومش قادر اقولكم من اول ما دخلت الجامع كم الانبهار بشكل وتصميم وضخامة وجمال المكان دا .. حتى مدخل وواجهة الجامع مختلفة واللون الازرق ال مكسو بيه جدران الجامع والتابلوهات والزخارف كل حاجة هناك مختلفة وجميلة اوى حتى صحن الجامع نفسه وجوا فى ضريح ابراهيم اغا المستحفظان ومعمول برضو كله من القيشانى الازرق وضريح الامير اق سنقر.. الجامع دا بالنسبة لى زى الكنز وكان ليه متعة خاصة .

خرجنا من الجامع وجمبه على طول لقينا مبنى ضخم جدااااااااا وكبير اوى وعريض ولما رحنا على البوابة عرفنا انه مجموعة وقصر خاير بك .. ودا عبارة عن قصر كبير اوى ومجموعة عبارة عن ضريح ومدرسة وسبيل وجامع .. والجامع هناك كان معلق يعنى مرتفع كتير جدا عن الارض وبتطلع له بسلالم .

وبشوية المزارات دى اكتشفنا للاسف ان يومنا خلص خلاص ومش هنلحق نزور حاجة تانية مع العلم ان لسى فى هناك مجموعة اضرحة وجوامع كتيير جدا وكمان فى هناك فى الشارع حاجة مهمة جداااااااا وهى الجزء المتبقى والكامل من سور صلاح الدين الايوبى بكل مشتملاته .. وال عرفته ان السور دا مغلق وبيفتح بتصاريح فقط ولكن ان شاء الله نزوره وننزله قريب

الموضوع والخروجة دى كلهاااا مكلفتنيش جنيه واحد حتى كل ال دفعته هو تمن المواصلات لحد باب زويلة بس لان كل المزارات مجانية وبدون تكت .. وطبعا بالنسبة للناس ال بيحبو الثقافة والفن والتراث الاماكن دى هتكون بالنسبة لهم لقطة.

طيب تروح هناك ازاى ؟؟

الوصول سهل جدا وبسيط خالص .. بالنسبة لو انت جاى من ناحية القلعة .. هتوصل لحد دار المحفوظات بالقلعة ودى ادارة داخل اسوار القلعة وتيجى هناك وتدهخل الشارع ال فى وش الدار وتمشى فيه هو دا شارع باب الوزير لا تدخل شمال ولا يمين وكل كام خطوة هتقابل اثر ادخله لحد ما تلاقى نفسك وصلت لبوابة كبيرة جدا ومئذنتين دى منطقة باب زويلة والخيامية .. ولو هتيجى من ناحية الغزرية يعنى هتركب اى مواصلة من العتبة او رمسيس وتنزل عند الغورية اخر كوبرى الازهر امشى فى شارع الغورية دا ال على ناصيته جامع وقبة الغورى لحد الاخر حوالى 8 دقائق مشى هتلاقى فى وشك اخر الشارع بوابة ضخمة جدا دا باب زويلة فى وشك الخيامية بعد ما تعدى البوابة .. خلى البوابة دى على ايدك الشمال بعد ما تخرج منها وامشى على طول .. دا بداية الشارع ومنطقة الدرب الاحمر .. ولو هتيجى من ميدان باب الخلق من عند مديرية امن القاهرة ومتحف الفن الاسلامى هتخلى مديرية امن القاهرة على ايدك الشمال ومتحف الفن الاسلامى فى ظهرك وامشى على طول لا شمال ولا يمين حوالى 5 دقايق مشى هتلاقى باب زويلة على ايدك الشمال كمل زى ما انت طول الشارع وابدء مزاراتك من عند باب زويلة المنطقة دى كلها مزارات .































































المقال "بالصور : شارع باب الوزير فى منطقة الدرب الاحمر - شارع عالمى كبير وعريق فى القاهرة" نشر بواسطة: Google Plus   بتاريخ:



اسم العضو:
سؤال عشوائي يجب الاجابة عليه

الرسالة:


رابط دائم

مواضيع مشابهة:
شاهد بالصور شارع التبرعات بجنوب افريقيا شئ رائع ـ شارع فكرته قمه فى الروعه والجمال
صلاح سالم صاحب أشهر شارع فى مصر - تعرف عليه الآن بالصور ولماذا تم تسمية شارع صلاح سالم بإسمه
اتفرج على شارع المظلات الملونة اجمل شارع في العالم
فيديو انهيار عقار فى شارع ابن منقذ فى منطقة فيكتوريا بالاسكندرية اليوم الجمعة 23/3/2012
منزل للبيع تمليك بعين شمس من شارع متفرع من شارع الزهراء


Powered by vBulletin Version 3.8.8
Copyright ©2000 - 2018, Jelsoft Enterprises Ltd
جميع الحقوق محفوظة © nmisr.com نجوم مصرية