مين فينا متألمش من اللوز خاصه فى مرحلة الطفوله ، وشاف الويل انتفاخ فى الحلق وألم فى البلع وتورم وحمى ويمكن كمان اكتر من كده لو عملت لا قدر الله الصديد فتلاقى حتى الرجلين فيهم ألم
طيب هما أيه اللوزتين دول وبيكونوا موجودين فين وأيه لازمتهم ؟
اللوز : عباره عن غده لمفاويه وبتبقا موجوده فى اخر الحلق ، اما عن دورها فهى بتقوم بالدفاع عن جسمك كله ضد اى مكروبات او جراثيم وعلشان كده هى بتلتهب كتير
طيب أيه الحل ؟
فى حاجات كتير بتساعدك على الشفاء بإذن الله طبعا من التهاب اللوز ومنها :
الشوربه الدافئه : أى سوائل دافئه هتكون مفيده جدا فى الحال هدى حتى لو كانت ميه دافيه بالأخص لو ضفت للشربه ملح وفلفل أسود وليمون ده هيساعدك كتير على التخفيف من الألم
ممكن تشرب عصير البنجر أو تاكله لأن ده مفيد جدا ، وفى الحقيقه هو مش مفيد بس للوز لأ ده مفيد فى كل حاجه علشان هو يحتوى على عناصر غذائيه كثيره بيحتاجها الجسم زى حمض الفوليك واليود والبوتاسيوم والكالسيوم والكبريت وكمان بيقوى المناعه
الجزر : على فكرة هو مش بس بيقوى النظر كما هو معروف عادة ، ده كمان يعتبر كمناعه لجسمك بشكل عام وللوز بشكل خاص فحاول أنك تكتر من عصير الجزر أو ممكن تشرب عصير برتقال بالجزر
الكركم : سبحان الله ربنا خلق لكل داء دواء وما استثناش حد أن ده غنى يعرف يجيبه ولا ده فقير يموت
العلاج الطبيعى هو الأكثر فعاليه ومش غالى فبيتناسب مع أى حد زى الكركم واللى ربنا جعل فيه عناصر بتخليه مضاد حيوى طبيعى للجسم ضد أى مرض
خاصة لو حطيت معلقه صغيره منه على كوب لبن دافئ هيساعد وبشكل فعال على تهدئة التهاب اللوز
العسل : قال تعالى "فيه شفاء للناس" صدق الله العظيم فى كل ما قال لأن العسل ده بيقوى بشكل كبير جدا من مناعة الجسم
وهو كمان غنى بمضادات للأكسده ، فلو حضرتك قمت بإضافة كوب ميه دافئه وعصرت عليها ليمونه كاملة وأضفت عليها ملعقة عسل يوميا أو أكثر من مرة فى اليوم حسب الحالة فبإذن الله سيتم الشفاء