السلام عليكم ورحمة الله وبركاته/
انا مواطن مصرى كنت من أوائل مصر فى الثانوية العامة والأول على دفعتى فى الجامعة من اسرة فقيرة. عينت معيد بكليتى وحدث لى مشاكل هائلة فى الماجستير فعملت سنتين باجر رمزى فى مكتب مشرف الرسالة وكل زملائى بالمثل والا مش حيخلصنى واضطررت لدفع مبلغ مادى كبير فى هذا الوقت رشوة لاحد الممتحنين المعروف عنهم ياتدفع ياتسقط مع ان رسالتى كانت ممتازة مما دمرنى نفسيا بالرغم من وقوف زملائي المعيدين معى من الفريقين فريق اولاد الدكاترة المعينين بالكوسة و فريق ولاد البطة السودة اللى مالهمش كوسة . المهم حصلت على الماجستير وبعثة حكومية فى أمريكا. خلصت الدكتوراه فى وقت قياسى فى 2009 ورجعت مصر لتبدأ المشاكل وجدت معظم المعيدين تقريبا كلهم من اولاد الدكاترة وكل دكاترة القسم فى إعارات ماعدا ولاد الدكاترة. لقيت رئيس القسم معين ولاده الاتنين معيدين وواحد منهم بيدرس مادة كاملة. المهم لقيت رئيس القسم بيقولى ان مافيش مواد فاضية وممكن ادخل سكاشن لأن عدد الدكاترة أكبر من حاجة القسم بأمارة إبنك المعيد وبعدين قالى انا جايبلك إعارة فى الخليج خد اجازة وتوكل على الله. جبت منحة امريكية لما بعد الدكتوراه وسافرت .. قامت الثورة قلت فرصة النظام القديم مشى وفرصة اخدم البلد قطعت منحتى من امريكا وعملت مشاكل جامدة مع المشرف علشان انزل. رجعت للكلية وتم انتخاب دكاترة الاخوان راحوا معينين ولادهم الدكاترة فى كل المناصب الحيوية بالجامعة ولقيتهم بدأوا حرب عليه بدون اى ذنب على اساس انى مش اخوان ومراتى مش محجبه مع انى ماليش فى السياسة و لقيت واحد منهم بيقول للطلبة انى نجحت فى الماجستير برشوة ولقيت واحد منهم بيقولى طول دقنك ولبس مراتك نقاب وتبقى معانا وينوبك من التورته .. يا دكتور انا معرفش الفرق بين السلف والاخوان انا ماليش غير فى الورقة والقلم. المهم ماكنش ليه لازمه فى الجامعة والكل قاللى ايه اللى رجعك. لقيت مشرفى من امريكا متصل بيه ومعاه رئيس فرع فى شركة معروفة وعرضوا عليه وظيفة. المهم مع الإحباط عملت اجازة مرافق لانى مينفعش ليه اعارة ده الى نصحنى بيه رئيس القسم وسافرت لامريكا تالت. بدات الشغل 6شهور والحمد لله اترقيت وسبقت الموظفين الامريكان اللى متعينين قبلى ومرتبى زاد بس الشىء اللى كان مكدرنى انى حرامى مزور لانى لا مرافق ولا حاجة وسارق فلوس البعثة. قلت اقدم استقالتى وادفع فلوس البعثة وأريح ضميرى. اتصلت بالبعثات لقيتهم بيقولوا عليه 300 ألف دولار منهم تذكرة رجوع من امريكا ب30 الف دولار لفردين مع انها 1500 دولار فى وقتها. كلمت اصحابى فى امريكا لقيتهم بيقولوا ان فلوس البعثة منحة لمصر من الدول الغربية ويحللوا سرقة الفلوس. المبلغ كبير جدا وحقعد اسدده 10 سنين بس انا اخدته -على الاقل 125,000 دولار- ومعترف. ممكن ساعة الجد يقولك سدده بفوايد 10 ولا 20% محدش عارف والاقيهم بالفايدة 600 الف دولار. ميعاد الاجازة المزورة جاى ولقيت احداث 30 يونيو جت ومش عايز اكرر غلطتى تانى وانزل وحاسس انى الدكتور العبقرى الحرامى وعايز اخلص من ذنوبى. معنديش خبرة حياتية طول عمرى بذاكر وزمايلى هنا بيقولوا انى محمل الامور زيادة ورايهم انى أجدد الاجازة زى الكل وادينا فى يوم حنرجع وبنحول فلوسنا لمصر ومصر مش محتاجانا. مش عارف انصحونى لو سمحتم انا تعبت?