1- ناقصلى حته
وأنا كل ماوزن
الاقى لسه ناقصلى حته
احط حته
تقل حته
واجيب قميص
تضيع جاكتة
واعيشلى ساعة
يفوتنى ستة
وكل ماوزن الاقى ناقص
أقول بناقص لو هيا حته
اتارى لسه ولسه باقى
سنين وحته
وحاجات تسبنى
وحاجات تاخدنى
لحاجات تخبط فى كل حته
وأقول هنفرح
فى يوم هنفرح
ويوم ما نفرح
على الله يفضل
فى القلب حته
---------------------------------
2- خد وادى معايا
وقولى كلام غير اى كلام
ولا الدنيا خلاص والناس بطلوا حب واحلام
طب أقولك
أحكيلى حدوتة لحد ما أنام
والعبلى فى شعرى
بقاله سنين مشدود ع البكر
فى بطاقتى الشخصية
مثبوت أن أنا أنثى وأنك دكر
الميه الرايقه بقالها سنين وملاها العكر
كان صيف وشتا وخريف ومطر
جرب تعزف
يمكن لسه جوايا حاجات
دور جوايا تلاقى حاجات وحاجات وحاجات
ضحك لفوانيس
وعروسة وعريس
ودلع ومياصة ولقم بنات
محتاجه لحزن وفرح ودمع ساعات
جرب تعزف
يمكن لسه جوانا نغم وعجب ودهب
وسامحنى
سامحنى ان كنت صريحة معاك الفجر وجب
شايفاك فى عيونك نار وغضب
سامعاك بتقول
ودى مين رباها بنت الكلب قليلة الأدب
---------------------------------
3- عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة
حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة
بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز
نعسان ده ولا ساكت وساير
بردان ده ولا ده دور وداير
وده إحنا ولا الكل حاير
---------------------------------
4- حالة حصار
شكلنا الصبح
زي شكلنا آخر النهار
و الدنيا برد
زي الدنيا حر نار
عرفت إيه معنى استعمار
من غير مدفع ولا عسكري
كنت فين يا علي
---------------------------------
5- معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا ولا في الكلام ولا عارف أنام
ولا حتى بسأل إيه ده إيه و أخرتها إيه و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني في ألم
أو يستلفلي من لئيم حبّة أمل
حالة كده .. معرفش إيه
حالة كده ملهاش معالم
ساعات تزورني في الربيع .. في الحر .. و في عز الشتا
و تجيب حاجات لا فيها روح ولا ميتة
لكني برجع منّها بعد السكات .. فاهم شوية في اللي فات
حاسس أوي بحزن الصحاب .. محظوظ أنا
ساعات أشاور ينفتحلي ألف باب
لكنّي بغلط في الحساب
معرفش ليه
---------------------------------
6- كيس البرتقان
غير كيس البرتقان
آخد منه و أقشر
و أضحك أحسن ماكشر
و أصدق روحي و أفشر
و أصدق إني باقدر
أفرح زي زمان
و لما خلص البرتقان
راح م المكان الونس
قربت من التليفون
جايز يرن الجرس
لقيتني أنا و روحي
مش مرتاحين لبعض
قلت مش مشكلة
المرة الجاية بقي
أعمل حسابي في قفص
مليان بالبرتقان
---------------------------------
7- وفضلت استنى
وفضلت استنى اسنتي
لحد ما عدى آخر قطر وفات
حزنت قعدت أعيط أعيط
تعبت م العياط
قلت أتمشى أتسلّى
أتفرج ع الشوارع والناس و العربيات
زهقت
قلت أرتاح
سندت على روحى
إتلخبطت جوايا كل الحاجات
مديت إيدى ف جيوبى
لقيت شويه ورق قديم
وصور وكروت تليفونات
قلت أكلّم مراتى
افتكرت إتها خدت الدوا
ونامت من تلات ساعات
قلت أكلّم اخويا
افتكرت إنه طلع معاش مبكر
وكاره تاريخه.. ومركّز فى التأمينات
أكلّم أختى
ها تعيد وتقول نفس الحكايات
أكلّم خالى
افتكرت انه غتت غتاته
ومعايا أنا بالذات
أكلّم خالتى
قلت يا واد
دى كانت خالتى وخالتك... واتفرقت الخالات
أكلّم صاحبى صلاح
افتكرت انه سافر العراق
وفى احتمال يكون مات
قلت أنا أصطاد موزه
واعمل دماغ
بس معرفش حد بتاع مخدرات
قلت امشى فى مظاهرة
لقيت العساكر راجعين.. مشطّبين على كل المظاهرات
قلت اتصل بالساده المسؤلين
هايتهمونى بإزعاج السلطات
قلت يا رب
أنا إيه
وليه
ونسيت إيه
وقطر إيه ده اللى فات
الله يرحمك بقى يابا
والفاتحة على كل الأموت
---------------------------------
8- عرفت قلوب كتير
عرفت قلوب كتير
الطيب واللبط
ده قلب منى طفش
وده قلب في شبط
وبين الفرح والوجع
أنا قلبى ياما اتخبط
لكنى بارجع وأعيش
وأعشق وأحب بعبط
نعيماٌ
---------------------------------
9- حمص الشام
يعني أنا مثلا
أبقي قاعد في البيت
بتفرج علي التمثيلية
و بقزقز لب
و بشرب حمص شام
أو بشوف الأهلي و الزمالك
في الدوري العام
أو بفتكر أنا و المدام
أيام الغرام
أو بعمل زي الناس
ما بتعمل في الحمام
يدخل عليا حد
من غير إحم و لا دستور
و يقوللي طبقا للدستور
عايزينك
طب بذمتك و دينك
ده اسمه كلام
معلش أنا بستفسر مش أكتر
علشان لما نروح
نروح و نيجي قوام
طب اشرب الحمص !
---------------------------------
10- كنت فين يا علي
أمك بتدور عليك ...
كنت باحفظ ف الحروف ...
غصب عني و ع الظروف ...
خدوا دوري فى الصفوف ...
وإنتي لسه بتسألي ..
كنت فين يا علي ...
كنت باحلم بالوظيفة ...
والحرير تحت القطيفة ..
الحياة طلعة مخيفة ....
كدبة بنت آرندلي ....
كنت فين يا علي ...
كنت بسأل إيه اللي صار ...
بره جنة .. وجوه نار ...
و عرفت إيه معني إستعمار ...
من غير مدفع ولا عسكري ...
كنت فين يا علي ....
كنت ماشي بدون بطاقة ....
لا عندي شوق ولا عندي طاقة ..
بسألك وبدون إساءة ..
إمتي تاني تنوري ....
كنت فين يا علي ........
---------------------------------
11- الواد ميشو
الواد ميشو
ابني الصغير
دمه خفيف شربات
من غير ما يقصد
ياما علمني حاجات
معدش بيحب الحواديت
ولا حكايات الشاطر حسن
المهم
بيموت ف الرز بلبن
ويغرق ف البلوظه
قلتله نفسك تبقي ايه
لما تكبر ياميشو
قاللي يابابا نفسي ابقي ....
قلت له لا
دي اتلغت ياحبيب بابا
قالي خلاص
ابقي انا ال ...
قلت له ودي محجوزه
قاللي يابابا ممكن ابقي ....
قلت له ودي للناس المحظوظه
قاللي هوا بقي
يابابا عايز ابقي ...
قلت له ودي محتاجه وقت
وانا كبرت
وامك كمان ست عجوزه
قاللي خنقتني يابابا
تصدق
قلت له جننتي يا ميشو
يا ابني نقي حلم
ينفع يتحقق
قاللي يابابا
بتسالني لييه
طب قوللي انت احلم بايه
وانا اديلك شويه
رز بلبن
---------------------------------
12- بتنسى يا فارس
بتنسى …
يا فارس ..
فلوس المدارس
و كأنك ...
ولا فاكر خالص
ولادك يا اخويا ....
بتدرس لغات ..
ده غير الباصات
وإلا الدروس ..
ها تبعت فلوس ..
بتنسى يا فارس ..
أتارى لأسامة ..
وجزمة سلامة ....
و شنطة منال
ما هم العيال
بتنسي .. يا فارس
قماش الستاير ..
و داير يا قلبى ..
في نفس الدواير ..
وبا ارجع الاقي ..
الصغير ... صغير
ونفس الشوارع ..
بتحلم تغير ...
بتنسي ..
يا فارس ....
في أول أجازة ..
نشوف الأراضي ...
في مصر الجديدة ...
يا إما المعادي ....
ها تنسي ..
يا فارس ....
---------------------------------
13- مين اللي بيعيط بحرقة دة
بقول لهم
مين اللي بيعيط بحرقة دة؟
مواطن اتصور وهوة بينضرب
قلتلهم
ومين الامور اللي بيضحك دة؟
قالوا لي
دة واحد عمل شوية كوارث وهرب
قلت لهم
والدنيا عتمة هناك كدة لية؟
قالوا لي
دي حتة جديدة بتتخرب
قلت لهم
مين الحاوي الي بيتكلم دة؟
قالوا لي
دة الوضع بيتقلب
و اية الهيصة اللي في الساحل الشمالي دي؟
قالوا لي
دي البقرة بتتحلب
قلت لهم وانتو قلقانين كدة لية؟
قالوا لي اصل بنلاعب الكاميرون
و خايفين نتغلب
---------------------------------
14- خربوها
الأوله آه ....
والتانية … آه
والتالتة ... مفيش
معنديش …
نفس أقول آه ...
معنديش …
قالو ..
إقلعوا … قلعنا
ومفيش ... بتعكوا
وبتعنا …
وصار متاعهم .. متاعنا ..
وألف مرة إتلسعنا ...
و برضك ... مفيش
الأوله …آه
والتانية .. آه
والتالتة ... مفيش ....
قالو إبصموا ...
بصمنا …
ده بكره ... سكر .. وسمنا
سيبنا غيرنا رسمنا
إتقسمنا …
على اد ما فينا من جراح ...
ابتسمنا …
الأولة .. والتانية .. والتالتة
مفيش …
الدنيا هاصت .. وهيصنا ..
ريحنا لما .. تيسنا
تاه الطريق من اتوبيسنا
يئسنا …
لا ... عرفنا ليه قلعنا ...
ولا عرفنا ...
إيه … ليبسنا ...
الأوله والتانية والتالتة مفيش
واهى .. ماشيه تجرى المسائل ..
ولا حد ... سائل ...تصحى مرسى ... ينام وائل
ده انا كنت واد م الأوائل ...
وكنت شاطر ... شطارة ...
وكنت فن .. وعمارة ..
وكنت صاحب تجارة ...
معرفش إيه اللى صابنى ...
فى قلبى ... ضاعت
سمارة ….
خربوها …..
خربوها ولاد ….القطقوطة
لا طرحت باميه ... ولا قوطه
وسابوها فى سرير مربوطه ..
و يا ريتهم طلعم رجاله ...
و يا ريتها .. رايقه .. و مبسوطه ..
خربوها …
دول سرقوا الهوا ... والضى ...
ويا عينى ... عليها بلد ...
يا ريتها ... ما قالت أى ..
ويا ريتها ما جابت ولد ..
خربوها …
دول سرقوا النخلتين .. والنهر
والمدرسة ..
والهندسة .. والجبر
سرقوا الشوارع ... والمعانى
والأغانى …
وسيد درويش .. والريحانى ..
سرقوا ... المشاعر .. والمزاهر
والبخور ...
سرقوا الحزن ...
سرقوا …حتى القبور ...
خربوها …
دول سرقوا الطيب .. والزين
وسرقوا …الكحل من العين
وسابوها .. تاكل بالدين ...
وان يوم أتعدلت ... عواجوها ..
خربوها …ولاد ال ..
خربوها ...
خربوها ولاد
ال ..
شر ....................................
---------------------------------
15- تيجي
تيجي نهرب ...
م الحقيقة ..
م الصور ..
من خبر عاجل يخض ..
تيجي …
لا نفهم ..
ولا نعرف ..
ولا نقدر نرد ...
تيجي ….
نتعلم سخافة ..
بشويش كده ..
بصنعة لطافة ..
وتبقي بياع الكنافة ..
وأبقي بياع الكلام ...
تيجي نهرب ...
م الألم ..
م الحزن ..
م الأحلام ....
تيجي نتعلم ننام ..
تيجي نتباع بكام ..
تيجي ….
نعمل عملية تجميل ..
و نشيل .....
ولا حرام .......
تيجي ….
نبقي طوب .. خشب .. إزاز
بلاطة جنب بلاطة ....
تيجي ….
ننسي بعض ببساطة ....
وتبقي بياع البطاطا ....
وأبقي بياع الهوا ...
تيجي ….
سوا … سوا
نهرب …
م الأمل ....
نطلع بطاقة ...
بدون عمل ...
نأجر عجل ..
نركب جمل ...
تيجي …
نبقي ف اللذاذة ..
وأجيب مصاصة ..
تجيب بزازة ....
تيجي نبقي ...
ملناش عازة ...
زي كل شئ جميل .....
تيجي ….
مستحيل …..
هي كده ....
وملهاش بديل .....
تيجي رجلك ...
تيجي …
تهرب بجلدك تنجرح .....
يوجعك قلبك بجد .......
لا تقبل أي حاجة ...
ولا تبقي أي حد ....
تيجي …..
---------------------------------
16- إستراحة ع الصحراوي …
الجو نار ...
والرطوبة ..
طوبة ...
ملزوقة ف قفايا ..
سايق …
و محدش معايا ...
غيري أنا ...
والذكريات ..
وحبة حاجات ..
إزازة الميه ..
ونظرة عينيا ...
اللي شايفها ...
في المرايا ...
بتبص لي ..
من وقت للتاني بغباء ..
كأنها عارفة الحكاية ..
أو واخدة بالها ...
م الطريق ....
مر السفر ....
من غير صديق ...
أول شمال ...
إرجع ولف ...
الغنوة سكتت ...
و الشريط ....
عمال يسف ..
وإزاي تخف ...
يا ألم من غير جراحة ..
آدي استراحة ...
دماغي محتاجة الصراحة ...
وقلبي محتاج الحنان ...
إركن هنا ....
اشرب ياعم قهوتك ..
ويالا عشان ...
نلحق مكان ..
قبل الغروب ..
وإوعي الردار يسحب ..
ف لحظة غنوتك ...
معدش فاضل ....
في الطريق ....
ولا إستراحة .......
---------------------------------
17- على حد علمي
على حد علمي ..احنا واسرائيل حبايب..
فيه سلام ومفيش حرب ...
طب الظباط والعساكر دول بيعملوا ايه في ميدان طلعت حرب ...!!
ده بنت وولد نازلين يشوفوا بلوزة تليق على ايشارب ..!!
بيحلموا وبيغنوا ..اجمل ما في غناهم انه طالع من القلب ..
من امتى العشق كان بيموت من الخوف ..
ومن امتى الحلم كان بيخاف من الضرب ..
يا كابتن يا باشا خليك ابن بلد ..
هوه انت معندكشي اخوات .. صبيان ولا بنات ؟؟!!
يعني انتو كل عليتكو ظباط ..يعني انتم أصحاب اكاديمية الشرطة ؟؟!!
واصحاب الشوارع.. والميادين و المحلات ..واصحاب البلد ؟؟!!
طيب .. طب انا هاخرم من التحرير لدار القضاء العالي ..
هاكل كشري واخش السيما .. مالك بقى ومالي ..؟؟!!
معايا بطاقة وخلصت الجيش .. بتسمي ده اكل عيش ؟؟!
يبقى عرفتك ..
طب عريني .. فتشني .. قطعلي هدومي وافحصني وخلصني ..!!
لا انت اول ولا اخر واحد ...
عارف ..؟؟
انا مرة القطر عدى وداسني وما موتش ...!!!!
عشق الحياة مهوش ترف ..!!
عرفت ايه معنى الشرف ..؟؟!!
جتك القرف..!!
جتك القرف!!
---------------------------------
18- شارع عبد العزيز..
صديقي الياباني..
كان في زياره لمصر تاني..
وهو شخص ابن بلد و لذيذ..
كان فرحان أوي و احنا بنتمشى في شارع عبد العزيز..
قاللي شايف يا فريكيكو
كل ده ياباني.. كل ده ياباني
وده اللي خلاني أقوله
طول عمرك يا سيكو سيكو خايب
شوف انت تسهر و تفكر و تصدر
و أنا آخد جمارك و ضرايب..
إنت هنا في بلاد العجايب..
أمال ايه..
قاللي ليه الهيصه الكتير دي واللمه
قلت له البلد كلها في ثانوية عامه..
عندكوا مكتب تنسيق يا سيكو سيكو
قاللي بس ده مش حل يا فريكيكو
عندنا في اليابان مافيش مستحيل
قلت له و عندناف مصر بالنا طويل
وعندنا تلات اهرامات و نيل..
و مستورة و زي الفل
قاللي عندنا ف اليابان المسئول اللي يغلط..
مفيش غير الانتحار..
قلت له و عندنا ف مصر
اللي يخربها بيخرج منها
معزز مكرم من صالة كبار الزوار
ده المسامح كريم يا أخي
وبعدين..
روحنا اتغدينا كوارع ف الحسين
من ساعتها مش عارف هو فين..
ما شفتش سيكو سيكو يا حاج رضا..
---------------------------------
19- أنا المواطن نقط نقط نقط ..
يكون ف علمك أنا مش جبان ...
ولا بتهان وأسكت زي زمان ..
أنا بصرخ وأكتب وأبعت وأتكلم ..
وأسمع بقي يامعلم ..
أنا المواطن نقط نقط نقط ..
رقم قومي نقط نقط نقط ..
محل الأقامة نقط نقط نقط بجوار البنزينة ..
بصراحة حرام تعملوا فينا نقط ونقط ونقط ..
وتطلعوا نقط و نقط أهالينا ..
عملتوا إنتخابات وكلها نقط نقط نقط ..
وشيلتوا وحطيتوا حاجات نقط ونقط ونقط ..
بصراحة ....
أنا بقيت قدام مراتي حاسس إني مش نقط خالص ..
وأقول لها نفسي أبقي نقط بجد ..
تقوللي يا خويا متحرقش دمك ..
محدش بينفع حد ..
حسك ف الدنيا ..
بكره تبقي نقط ونقط ونقط .. !
---------------------------------
20- خس وجزر ..
فاكر الأرنب الغضبان ..
بتاع زمان
اللي كان في كتاب المطالعة ..
لما قال أنا زهقان ..
م الخس والجزر ..
قالوا عليه كفر ..
ومرمطوه غربة وسفر
م الواحات للقلعة ..
لحد ما قال خلاص حرام
مش قادر أقول الآه ..
وكل أمه ما تقوله ..
إيه أخبار الجزر ..
يقولها يا سلام ياسلام ..
وأخبار الخس ..
الله الله ..
إيه الحلاوة دي ...
طب فاكر
القضاء ع الإقطاع وأعوانة ..
الله يرحمك بقي يامه..
قلتيلي الكتاب بيبان من عنوانه ..
طب فاكر
كامل عامل ف المصنع ..
معرفش فين المصنع ..
وكامل علي ما اسمع ..
مات غريق وهو بيحاول..
يهرب ل إيطاليا ..
فاكر تحيا الحرية ..
طب آدينا كلنا بقينا ..
أرانب ف حلة ملوخية ..
بالهنا والشفا ..
يا كابتن ..
---------------------------------
21- بوابة تفتيش.....
بوابة تفتيش على بابك....
كل ما أحاول أعدي تزمر....
و بتتشرط....
و بتتأمر...
أرجع أدور تاني و أدور...
وكل ما أعدي برضه تزمر....
طب آدي الساعه....
و آدي حزامي...
و آدي بطاقتي...
و النضارة...
و آدي عنواني....
و كل حكايتي..
و آدي أمارة...
حتى الفكه الباقيه ف جيبي...
والاشعار...
و المحفظه مفيهاش غير صورتك..
ليل و نهار..
كل هدومي..
زي ما نازل من بطن أمي..
من غير حتى ورقة توت..
و كل ما فوت..
البوابه برضك بتزمر..
و لما لمحني..
واحد طيب م الحراس..
و قاللي اسمعني يا ابن الناس..
إرمي الحته الحلوه ف قلبك..
و عدي..
و البوابه عمرها..
ما تزمر..
و انتظرو باقي القصائد.....
وأنا كل ماوزن
الاقى لسه ناقصلى حته
احط حته
تقل حته
واجيب قميص
تضيع جاكتة
واعيشلى ساعة
يفوتنى ستة
وكل ماوزن الاقى ناقص
أقول بناقص لو هيا حته
اتارى لسه ولسه باقى
سنين وحته
وحاجات تسبنى
وحاجات تاخدنى
لحاجات تخبط فى كل حته
وأقول هنفرح
فى يوم هنفرح
ويوم ما نفرح
على الله يفضل
فى القلب حته
---------------------------------
2- خد وادى معايا
وقولى كلام غير اى كلام
ولا الدنيا خلاص والناس بطلوا حب واحلام
طب أقولك
أحكيلى حدوتة لحد ما أنام
والعبلى فى شعرى
بقاله سنين مشدود ع البكر
فى بطاقتى الشخصية
مثبوت أن أنا أنثى وأنك دكر
الميه الرايقه بقالها سنين وملاها العكر
كان صيف وشتا وخريف ومطر
جرب تعزف
يمكن لسه جوايا حاجات
دور جوايا تلاقى حاجات وحاجات وحاجات
ضحك لفوانيس
وعروسة وعريس
ودلع ومياصة ولقم بنات
محتاجه لحزن وفرح ودمع ساعات
جرب تعزف
يمكن لسه جوانا نغم وعجب ودهب
وسامحنى
سامحنى ان كنت صريحة معاك الفجر وجب
شايفاك فى عيونك نار وغضب
سامعاك بتقول
ودى مين رباها بنت الكلب قليلة الأدب
---------------------------------
3- عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة
حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة
بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز
نعسان ده ولا ساكت وساير
بردان ده ولا ده دور وداير
وده إحنا ولا الكل حاير
---------------------------------
4- حالة حصار
شكلنا الصبح
زي شكلنا آخر النهار
و الدنيا برد
زي الدنيا حر نار
عرفت إيه معنى استعمار
من غير مدفع ولا عسكري
كنت فين يا علي
---------------------------------
5- معرفش ليه تنّحت للدنيا كده
فجأة لقيتني مسكون بالملل
لا عندي رغبة في البكا ولا في الكلام ولا عارف أنام
ولا حتى بسأل إيه ده إيه و أخرتها إيه و إيه العمل
و أخاف أقول لأي حد
أحسن يقوم يقلبها جد
حد صاحبي ينزعج
يمد إيده في قلبه من باب الكرم
عشان يشاركني في ألم
أو يستلفلي من لئيم حبّة أمل
حالة كده .. معرفش إيه
حالة كده ملهاش معالم
ساعات تزورني في الربيع .. في الحر .. و في عز الشتا
و تجيب حاجات لا فيها روح ولا ميتة
لكني برجع منّها بعد السكات .. فاهم شوية في اللي فات
حاسس أوي بحزن الصحاب .. محظوظ أنا
ساعات أشاور ينفتحلي ألف باب
لكنّي بغلط في الحساب
معرفش ليه
---------------------------------
6- كيس البرتقان
غير كيس البرتقان
آخد منه و أقشر
و أضحك أحسن ماكشر
و أصدق روحي و أفشر
و أصدق إني باقدر
أفرح زي زمان
و لما خلص البرتقان
راح م المكان الونس
قربت من التليفون
جايز يرن الجرس
لقيتني أنا و روحي
مش مرتاحين لبعض
قلت مش مشكلة
المرة الجاية بقي
أعمل حسابي في قفص
مليان بالبرتقان
---------------------------------
7- وفضلت استنى
وفضلت استنى اسنتي
لحد ما عدى آخر قطر وفات
حزنت قعدت أعيط أعيط
تعبت م العياط
قلت أتمشى أتسلّى
أتفرج ع الشوارع والناس و العربيات
زهقت
قلت أرتاح
سندت على روحى
إتلخبطت جوايا كل الحاجات
مديت إيدى ف جيوبى
لقيت شويه ورق قديم
وصور وكروت تليفونات
قلت أكلّم مراتى
افتكرت إتها خدت الدوا
ونامت من تلات ساعات
قلت أكلّم اخويا
افتكرت إنه طلع معاش مبكر
وكاره تاريخه.. ومركّز فى التأمينات
أكلّم أختى
ها تعيد وتقول نفس الحكايات
أكلّم خالى
افتكرت انه غتت غتاته
ومعايا أنا بالذات
أكلّم خالتى
قلت يا واد
دى كانت خالتى وخالتك... واتفرقت الخالات
أكلّم صاحبى صلاح
افتكرت انه سافر العراق
وفى احتمال يكون مات
قلت أنا أصطاد موزه
واعمل دماغ
بس معرفش حد بتاع مخدرات
قلت امشى فى مظاهرة
لقيت العساكر راجعين.. مشطّبين على كل المظاهرات
قلت اتصل بالساده المسؤلين
هايتهمونى بإزعاج السلطات
قلت يا رب
أنا إيه
وليه
ونسيت إيه
وقطر إيه ده اللى فات
الله يرحمك بقى يابا
والفاتحة على كل الأموت
---------------------------------
8- عرفت قلوب كتير
عرفت قلوب كتير
الطيب واللبط
ده قلب منى طفش
وده قلب في شبط
وبين الفرح والوجع
أنا قلبى ياما اتخبط
لكنى بارجع وأعيش
وأعشق وأحب بعبط
نعيماٌ
---------------------------------
9- حمص الشام
يعني أنا مثلا
أبقي قاعد في البيت
بتفرج علي التمثيلية
و بقزقز لب
و بشرب حمص شام
أو بشوف الأهلي و الزمالك
في الدوري العام
أو بفتكر أنا و المدام
أيام الغرام
أو بعمل زي الناس
ما بتعمل في الحمام
يدخل عليا حد
من غير إحم و لا دستور
و يقوللي طبقا للدستور
عايزينك
طب بذمتك و دينك
ده اسمه كلام
معلش أنا بستفسر مش أكتر
علشان لما نروح
نروح و نيجي قوام
طب اشرب الحمص !
---------------------------------
10- كنت فين يا علي
أمك بتدور عليك ...
كنت باحفظ ف الحروف ...
غصب عني و ع الظروف ...
خدوا دوري فى الصفوف ...
وإنتي لسه بتسألي ..
كنت فين يا علي ...
كنت باحلم بالوظيفة ...
والحرير تحت القطيفة ..
الحياة طلعة مخيفة ....
كدبة بنت آرندلي ....
كنت فين يا علي ...
كنت بسأل إيه اللي صار ...
بره جنة .. وجوه نار ...
و عرفت إيه معني إستعمار ...
من غير مدفع ولا عسكري ...
كنت فين يا علي ....
كنت ماشي بدون بطاقة ....
لا عندي شوق ولا عندي طاقة ..
بسألك وبدون إساءة ..
إمتي تاني تنوري ....
كنت فين يا علي ........
---------------------------------
11- الواد ميشو
الواد ميشو
ابني الصغير
دمه خفيف شربات
من غير ما يقصد
ياما علمني حاجات
معدش بيحب الحواديت
ولا حكايات الشاطر حسن
المهم
بيموت ف الرز بلبن
ويغرق ف البلوظه
قلتله نفسك تبقي ايه
لما تكبر ياميشو
قاللي يابابا نفسي ابقي ....
قلت له لا
دي اتلغت ياحبيب بابا
قالي خلاص
ابقي انا ال ...
قلت له ودي محجوزه
قاللي يابابا ممكن ابقي ....
قلت له ودي للناس المحظوظه
قاللي هوا بقي
يابابا عايز ابقي ...
قلت له ودي محتاجه وقت
وانا كبرت
وامك كمان ست عجوزه
قاللي خنقتني يابابا
تصدق
قلت له جننتي يا ميشو
يا ابني نقي حلم
ينفع يتحقق
قاللي يابابا
بتسالني لييه
طب قوللي انت احلم بايه
وانا اديلك شويه
رز بلبن
---------------------------------
12- بتنسى يا فارس
بتنسى …
يا فارس ..
فلوس المدارس
و كأنك ...
ولا فاكر خالص
ولادك يا اخويا ....
بتدرس لغات ..
ده غير الباصات
وإلا الدروس ..
ها تبعت فلوس ..
بتنسى يا فارس ..
أتارى لأسامة ..
وجزمة سلامة ....
و شنطة منال
ما هم العيال
بتنسي .. يا فارس
قماش الستاير ..
و داير يا قلبى ..
في نفس الدواير ..
وبا ارجع الاقي ..
الصغير ... صغير
ونفس الشوارع ..
بتحلم تغير ...
بتنسي ..
يا فارس ....
في أول أجازة ..
نشوف الأراضي ...
في مصر الجديدة ...
يا إما المعادي ....
ها تنسي ..
يا فارس ....
---------------------------------
13- مين اللي بيعيط بحرقة دة
بقول لهم
مين اللي بيعيط بحرقة دة؟
مواطن اتصور وهوة بينضرب
قلتلهم
ومين الامور اللي بيضحك دة؟
قالوا لي
دة واحد عمل شوية كوارث وهرب
قلت لهم
والدنيا عتمة هناك كدة لية؟
قالوا لي
دي حتة جديدة بتتخرب
قلت لهم
مين الحاوي الي بيتكلم دة؟
قالوا لي
دة الوضع بيتقلب
و اية الهيصة اللي في الساحل الشمالي دي؟
قالوا لي
دي البقرة بتتحلب
قلت لهم وانتو قلقانين كدة لية؟
قالوا لي اصل بنلاعب الكاميرون
و خايفين نتغلب
---------------------------------
14- خربوها
الأوله آه ....
والتانية … آه
والتالتة ... مفيش
معنديش …
نفس أقول آه ...
معنديش …
قالو ..
إقلعوا … قلعنا
ومفيش ... بتعكوا
وبتعنا …
وصار متاعهم .. متاعنا ..
وألف مرة إتلسعنا ...
و برضك ... مفيش
الأوله …آه
والتانية .. آه
والتالتة ... مفيش ....
قالو إبصموا ...
بصمنا …
ده بكره ... سكر .. وسمنا
سيبنا غيرنا رسمنا
إتقسمنا …
على اد ما فينا من جراح ...
ابتسمنا …
الأولة .. والتانية .. والتالتة
مفيش …
الدنيا هاصت .. وهيصنا ..
ريحنا لما .. تيسنا
تاه الطريق من اتوبيسنا
يئسنا …
لا ... عرفنا ليه قلعنا ...
ولا عرفنا ...
إيه … ليبسنا ...
الأوله والتانية والتالتة مفيش
واهى .. ماشيه تجرى المسائل ..
ولا حد ... سائل ...تصحى مرسى ... ينام وائل
ده انا كنت واد م الأوائل ...
وكنت شاطر ... شطارة ...
وكنت فن .. وعمارة ..
وكنت صاحب تجارة ...
معرفش إيه اللى صابنى ...
فى قلبى ... ضاعت
سمارة ….
خربوها …..
خربوها ولاد ….القطقوطة
لا طرحت باميه ... ولا قوطه
وسابوها فى سرير مربوطه ..
و يا ريتهم طلعم رجاله ...
و يا ريتها .. رايقه .. و مبسوطه ..
خربوها …
دول سرقوا الهوا ... والضى ...
ويا عينى ... عليها بلد ...
يا ريتها ... ما قالت أى ..
ويا ريتها ما جابت ولد ..
خربوها …
دول سرقوا النخلتين .. والنهر
والمدرسة ..
والهندسة .. والجبر
سرقوا الشوارع ... والمعانى
والأغانى …
وسيد درويش .. والريحانى ..
سرقوا ... المشاعر .. والمزاهر
والبخور ...
سرقوا الحزن ...
سرقوا …حتى القبور ...
خربوها …
دول سرقوا الطيب .. والزين
وسرقوا …الكحل من العين
وسابوها .. تاكل بالدين ...
وان يوم أتعدلت ... عواجوها ..
خربوها …ولاد ال ..
خربوها ...
خربوها ولاد
ال ..
شر ....................................
---------------------------------
15- تيجي
تيجي نهرب ...
م الحقيقة ..
م الصور ..
من خبر عاجل يخض ..
تيجي …
لا نفهم ..
ولا نعرف ..
ولا نقدر نرد ...
تيجي ….
نتعلم سخافة ..
بشويش كده ..
بصنعة لطافة ..
وتبقي بياع الكنافة ..
وأبقي بياع الكلام ...
تيجي نهرب ...
م الألم ..
م الحزن ..
م الأحلام ....
تيجي نتعلم ننام ..
تيجي نتباع بكام ..
تيجي ….
نعمل عملية تجميل ..
و نشيل .....
ولا حرام .......
تيجي ….
نبقي طوب .. خشب .. إزاز
بلاطة جنب بلاطة ....
تيجي ….
ننسي بعض ببساطة ....
وتبقي بياع البطاطا ....
وأبقي بياع الهوا ...
تيجي ….
سوا … سوا
نهرب …
م الأمل ....
نطلع بطاقة ...
بدون عمل ...
نأجر عجل ..
نركب جمل ...
تيجي …
نبقي ف اللذاذة ..
وأجيب مصاصة ..
تجيب بزازة ....
تيجي نبقي ...
ملناش عازة ...
زي كل شئ جميل .....
تيجي ….
مستحيل …..
هي كده ....
وملهاش بديل .....
تيجي رجلك ...
تيجي …
تهرب بجلدك تنجرح .....
يوجعك قلبك بجد .......
لا تقبل أي حاجة ...
ولا تبقي أي حد ....
تيجي …..
---------------------------------
16- إستراحة ع الصحراوي …
الجو نار ...
والرطوبة ..
طوبة ...
ملزوقة ف قفايا ..
سايق …
و محدش معايا ...
غيري أنا ...
والذكريات ..
وحبة حاجات ..
إزازة الميه ..
ونظرة عينيا ...
اللي شايفها ...
في المرايا ...
بتبص لي ..
من وقت للتاني بغباء ..
كأنها عارفة الحكاية ..
أو واخدة بالها ...
م الطريق ....
مر السفر ....
من غير صديق ...
أول شمال ...
إرجع ولف ...
الغنوة سكتت ...
و الشريط ....
عمال يسف ..
وإزاي تخف ...
يا ألم من غير جراحة ..
آدي استراحة ...
دماغي محتاجة الصراحة ...
وقلبي محتاج الحنان ...
إركن هنا ....
اشرب ياعم قهوتك ..
ويالا عشان ...
نلحق مكان ..
قبل الغروب ..
وإوعي الردار يسحب ..
ف لحظة غنوتك ...
معدش فاضل ....
في الطريق ....
ولا إستراحة .......
---------------------------------
17- على حد علمي
على حد علمي ..احنا واسرائيل حبايب..
فيه سلام ومفيش حرب ...
طب الظباط والعساكر دول بيعملوا ايه في ميدان طلعت حرب ...!!
ده بنت وولد نازلين يشوفوا بلوزة تليق على ايشارب ..!!
بيحلموا وبيغنوا ..اجمل ما في غناهم انه طالع من القلب ..
من امتى العشق كان بيموت من الخوف ..
ومن امتى الحلم كان بيخاف من الضرب ..
يا كابتن يا باشا خليك ابن بلد ..
هوه انت معندكشي اخوات .. صبيان ولا بنات ؟؟!!
يعني انتو كل عليتكو ظباط ..يعني انتم أصحاب اكاديمية الشرطة ؟؟!!
واصحاب الشوارع.. والميادين و المحلات ..واصحاب البلد ؟؟!!
طيب .. طب انا هاخرم من التحرير لدار القضاء العالي ..
هاكل كشري واخش السيما .. مالك بقى ومالي ..؟؟!!
معايا بطاقة وخلصت الجيش .. بتسمي ده اكل عيش ؟؟!
يبقى عرفتك ..
طب عريني .. فتشني .. قطعلي هدومي وافحصني وخلصني ..!!
لا انت اول ولا اخر واحد ...
عارف ..؟؟
انا مرة القطر عدى وداسني وما موتش ...!!!!
عشق الحياة مهوش ترف ..!!
عرفت ايه معنى الشرف ..؟؟!!
جتك القرف..!!
جتك القرف!!
---------------------------------
18- شارع عبد العزيز..
صديقي الياباني..
كان في زياره لمصر تاني..
وهو شخص ابن بلد و لذيذ..
كان فرحان أوي و احنا بنتمشى في شارع عبد العزيز..
قاللي شايف يا فريكيكو
كل ده ياباني.. كل ده ياباني
وده اللي خلاني أقوله
طول عمرك يا سيكو سيكو خايب
شوف انت تسهر و تفكر و تصدر
و أنا آخد جمارك و ضرايب..
إنت هنا في بلاد العجايب..
أمال ايه..
قاللي ليه الهيصه الكتير دي واللمه
قلت له البلد كلها في ثانوية عامه..
عندكوا مكتب تنسيق يا سيكو سيكو
قاللي بس ده مش حل يا فريكيكو
عندنا في اليابان مافيش مستحيل
قلت له و عندناف مصر بالنا طويل
وعندنا تلات اهرامات و نيل..
و مستورة و زي الفل
قاللي عندنا ف اليابان المسئول اللي يغلط..
مفيش غير الانتحار..
قلت له و عندنا ف مصر
اللي يخربها بيخرج منها
معزز مكرم من صالة كبار الزوار
ده المسامح كريم يا أخي
وبعدين..
روحنا اتغدينا كوارع ف الحسين
من ساعتها مش عارف هو فين..
ما شفتش سيكو سيكو يا حاج رضا..
---------------------------------
19- أنا المواطن نقط نقط نقط ..
يكون ف علمك أنا مش جبان ...
ولا بتهان وأسكت زي زمان ..
أنا بصرخ وأكتب وأبعت وأتكلم ..
وأسمع بقي يامعلم ..
أنا المواطن نقط نقط نقط ..
رقم قومي نقط نقط نقط ..
محل الأقامة نقط نقط نقط بجوار البنزينة ..
بصراحة حرام تعملوا فينا نقط ونقط ونقط ..
وتطلعوا نقط و نقط أهالينا ..
عملتوا إنتخابات وكلها نقط نقط نقط ..
وشيلتوا وحطيتوا حاجات نقط ونقط ونقط ..
بصراحة ....
أنا بقيت قدام مراتي حاسس إني مش نقط خالص ..
وأقول لها نفسي أبقي نقط بجد ..
تقوللي يا خويا متحرقش دمك ..
محدش بينفع حد ..
حسك ف الدنيا ..
بكره تبقي نقط ونقط ونقط .. !
---------------------------------
20- خس وجزر ..
فاكر الأرنب الغضبان ..
بتاع زمان
اللي كان في كتاب المطالعة ..
لما قال أنا زهقان ..
م الخس والجزر ..
قالوا عليه كفر ..
ومرمطوه غربة وسفر
م الواحات للقلعة ..
لحد ما قال خلاص حرام
مش قادر أقول الآه ..
وكل أمه ما تقوله ..
إيه أخبار الجزر ..
يقولها يا سلام ياسلام ..
وأخبار الخس ..
الله الله ..
إيه الحلاوة دي ...
طب فاكر
القضاء ع الإقطاع وأعوانة ..
الله يرحمك بقي يامه..
قلتيلي الكتاب بيبان من عنوانه ..
طب فاكر
كامل عامل ف المصنع ..
معرفش فين المصنع ..
وكامل علي ما اسمع ..
مات غريق وهو بيحاول..
يهرب ل إيطاليا ..
فاكر تحيا الحرية ..
طب آدينا كلنا بقينا ..
أرانب ف حلة ملوخية ..
بالهنا والشفا ..
يا كابتن ..
---------------------------------
21- بوابة تفتيش.....
بوابة تفتيش على بابك....
كل ما أحاول أعدي تزمر....
و بتتشرط....
و بتتأمر...
أرجع أدور تاني و أدور...
وكل ما أعدي برضه تزمر....
طب آدي الساعه....
و آدي حزامي...
و آدي بطاقتي...
و النضارة...
و آدي عنواني....
و كل حكايتي..
و آدي أمارة...
حتى الفكه الباقيه ف جيبي...
والاشعار...
و المحفظه مفيهاش غير صورتك..
ليل و نهار..
كل هدومي..
زي ما نازل من بطن أمي..
من غير حتى ورقة توت..
و كل ما فوت..
البوابه برضك بتزمر..
و لما لمحني..
واحد طيب م الحراس..
و قاللي اسمعني يا ابن الناس..
إرمي الحته الحلوه ف قلبك..
و عدي..
و البوابه عمرها..
ما تزمر..
و انتظرو باقي القصائد.....
