لسه فى ناس لحد الحظة دى بتقول انها مسامحة الريس
لسه فى ناس لحد دلوقتى مش شايفه انه مذنب
لسه فى ناس بتقول الريس مكنش يعرف
لو هقول انا مسامح الريس هقولها ليه لانه الريس :
قتل مصريين تانين مش انا
يتم ابن الجيران يعنى بعيد عنى
وانا ازعل بس على نفسى طالما انا عايش يبقى فى ستين داهية باقى المصريين
اصله سمح للاجانب يدفنو بقايا النووى فى الصحرا
و خلانا نبطل زراعة و جاب اكل مسرطن لللمصريين
بس الحمد لله ربنا يديمها نعمة عليا الصحة عندى تمام
مش مهم الاطفال والكبار اللى جالهم سرطان
وثم انه فى حد ذاته انجاز واعظم انجازات الرئيس احنا وبلا فخر اكبر دولة فيها سرطان منتشر فى الشعب
على المتضرر يفضل متضرر
على الى عنده كرامة يمحيها زيى ويحب جلادى
على الشريف يحب الفاسد بابا حسنى
على المصرى يفضل متخلف
فيها ايه فوق ال 800 مصرى ماتوا ولا يهمنى و اكتر من 1200 واحد شباب زى الورد بقوا بعين واحدة
فيها ايه امن الدولة عذب الناس وكهربهم وقبض على شوية بدون تهم تذكر
و فيها ايه لما الريس يسرق مصر 30 سنه ويداينها
مهو رجع طابا
هتقولو ده شغله و الا هو فاضي
طيب مش دى وظيفته و الا كان بيمسكها ليه؟
انا لا اسمع لا ارى لا افهم بردو بحبه
اصله ياجماعه انا عبد لسيادته او انه برقبة 85 مليون مصرى
انا ابيع بلدى واهلها علشانه ماهو من غير رئيس يذلنى ما اقدرش اعيش
اصلى ماعرفش اعيش عيشه كريمة ولا انى يكون لى فى بلاد الغرب كرامة و لاحتى فى بلدى كرامة
انا خدت على الضرب على القفا و الذل فى بلدى و الاكل المسرطن و المياة الملوثه
مااقدرش اعيش محترم فى بلدى وبراها
اقول ايه و الا ايه و الا ايه ؟؟؟
كل دة و بنقول اسفين يا ريس مين الى يعتذر لمين
كلام كتير قلته و كلام كتير لسه ماقولتوش
ممكن اخواتى هنا يقولوه فى تعليقاتهم
و كل كلامنا دة اهداء لكل شخص لسه بيدافع عن الريس
و بيقول انه مالوش ذنب و انه اتخدع و اخد تقارير مضلله من اللى حواليه
