كتير منا مش عارف أيه مشاكل وعيوب أيفون 5 ، أنهاردة هنتكلم عموماً عن منتجات أبل وخصوصاً الأيفونات، كترت مشاكل وأخطاء شركة أبل في تصنيع الأيفونات وخصوصاً أيفون 5 وعشان كده هقولكم على أهم عيوب أيفون 5 وأنشاء الله تستفادو منها.
Iphone 5 بيتكسر لو وقع من على طيارة على أرتفاع 60 الف قدم
عن تجربة يعنى فعلا بيتكسر لو وقع من جيبك وأنت في طيارة على بعد 60 ألف قدم
وده عيب كبير جداً للناس البيحبو يسافرو كتير ومشكلة كبيرة بالنسبة ليهم وده سبب كبير يخليك متشتريش أيفون 5.
من أهم وأكبر مشكلة Iphone 5 أنه بيتحرق لو أتحط في فرن يصهر الحديد
أيه الأستهتار ده لأ بجد يعنى موضوع ميتسكتش عليه، ازاي موبايل زي أيفون 5 مبيقدرش يقاوم حرارة زي ديه، ده طبعاً مشكلة كبيرة جداً للناس البتنام في فرن يعنى دلوقتى يصحي يلاقي موبايله أنصهر لأ لأ مش أسلوب خالص ده شركة أبل جاية تهزر.
Iphone 5 بينفجر لو أضرب فيه صاروخ بشكل مباشر
لأ بجد الشركة المرة ديه زودتها يعنى الواحد هيلاقيها من مشكلة الحرارة ولا الصواريخ، أزاي الشركة نسيت حاجة مهمة زي ديه لأ بجد أيه ده يعنى ممكن تكون ماشي ف الشارع ويحصل عليك هجوم جوي ويضرب عليك صاروخ يفجر الموبايل ليه يا عم فلوس حرام هي لأ بجد مشكلة ميتسكتش عليها.
Iphone 5 مبيستحملش ضغط المية على عمق م 3900 في قاع المحيط الهادي
أزاي يا ناس يعنى أروح أجيب موبايل سعره معدي الخمسة ويبوظ لو نزلت بيه قاع المحيط الهادي أهبل أنا عشان أجيب أيفون 5، مشكلة خطيرة جداً بتواجه الناس البتغرق أقصد البيغوصو في المحيط الهادي طب قولى أنت لو أنت على سفينة تايتنك دلوقتى ومعاك أيفون 5 وغرقت السفينة وبقيت ف قاع المحيط الهادي يقوم يبوظ منك الموبايل وده أسمه كلام برضه لأ بجد مشكلة خطيرة ومهمة جداً.
لو كانت كل العيوب ديه بتأثر على أستخدامك الشخصي فأنا بنصحك تبعد عن أيفون 5 تماماً أو أي أيفون غيره أو أقولك بلاها موبايلات خالص عشان أحنا كده عايزين بالشكل ده غواصة، مدراعة مش موبايل يا رب موضوعي يكون أفدكم وأكون عرفتكم أخطر عيوب شركة أبل.
