طرح الفنان أحمد مكي أمس الثلاثاء أغنية جديدة بعنوان “أغلي من الياقوت” والأغنية من كلمات أحمد مكي ومن ألحان وتوزيع شادي السعيد، والكليب من أخراج “مكي” وبالتعاون مع أحمد يوسف مدير التصوير، وتم تصوير الكليب في الفيوم وأستطاعت الأغنية تخطي حاجز 2 مليون مشاهدة في اليوم الأول لها.
كلمات الأغنية
يوم ميلادك
يوم ما للدنيا إنت جيت
أول علاقتى بيك صوتك ما بينى وبينك حيط.
سمعت صوتك إستغربت إتلخبطت إتشديت
قلبى إتنفض ما بين ضلوعى وم الفرحة بكيت.
أول ما شفتك الدنيا لفت بيا.
ربى حبنى ووهب ليا من عنده هدية.
سرحت فيك ساعات
فيك منى كتير حاجات.
يا رب تاخد منى بس الحلو في الصفات.
و في وسط زحمة فرحتى فجأة هجم سكات
مخلوط صور أبيض في أسود من إلى عشته ومن إلى فات.
يمكن عشان الضلمة في طفولتى كانت أكتر من نور.
عيل صغير قال بسم الله وقام يعدى في بجور.
مش شايف شط أو ميناء لآخر البصر مافيش أمل
كان نفسى في حد يعلمنى وينصحنى ويبقإلى المثل.
ربك حمانى وإتولانى برحمته مافيش جدل
بعد ما كل سكة إتسدت وإسودت والباب قفل.
يا رب يا كريم إهدينى وقوينى ووفقنى لسكة تربيته على الشىء السليم
عارف إنى مش مثإلى بس طمعان في كرمك تخلى حاله أحسن من حالى.
و انا أوعدك يا رب هحاول أبقى أحسن أب
و أديه إلى ما شفته في نهر طفولتى إلى نضب.
كل يوم بيعدى وأشوفك فيه بتكبر يتفاجىء، إن صفاتى بتظهر فيك أكتر وأكتر
إبتسامتى وضحكتى والمشى وحتى تكشيرتى
حتى نومتك رجل فوق رجل دى نسخة من نومتى.
قبل وجودك الدنيا ماكانتش فارقة معايا.
قلبى ده كان خلاص قلب حجر دى مش كناية
جلدى تخن من قسوة الدنيا ومر الحكاية
بقيت زعلان على الشخص إلى شايفه في المراية.
لحد ما إنت جيت غيرتنى وكنت الهداية.
فتحت بإيدك كل أبواب الرحمة جوايا.
لما بحضنك وأحس دقة قلبى جنب قلبك
مية في المية ما حبتش في الدنيا قبلك.
لما بحضر أول مرة ليك في أى حاجة
قلبى بيرفرف وأحس بألف حاجة وحاجة.
إحساس غريب جزأ منى إتحول إنسان
بيزعل وبيفرح وبيزرع جوايا الحنان
خايف عليك من الدنيا يا إبنى مالهاش أمان
و بدعى ربنا يحميك ويصونك هو الرحمن
كتبت رسالة ليك عشان لو قدرى وقته حان
و مش مكتوب ليا أكون جنبك لآخر الإمتحان
عاوزك تكون صاحب عزيمة فولاذ حديد
مهما الدنيا تحبطك صمم خليك عنيد
خليك واثق في نفسك عن حلمك إياك تحيد
مهما إسود الليل وطال هيطلع فجر جديد
عاوزك لربك شاكر وجهد الناس تقدر
و إوعى تظلم مهما كنت قادر، ربك أقدر
إوعى تفضح عيب إنسان لو ربك ستر
كما تدين تدان ما تضمنشى القدر
لو قلت كلمة حق والناس قامت عليك
كأنهم قالولك مبروك تسلم إيديك
عشان الكلب الميت ضربه مش مطلوب
لكن لو كان شجر مثمر بيتحدف بالطوب
لو يوم ذنوبك تقلت إرجع لربك توب
ربك لو حبك هيحبب فيك كل القلوب
ساعات بسرح وبسأل نفسى والدماغ تفكر
يا ترى حتبقى فعلا ضهرى لما أكبر
لما العجز يبدأ ينهش فيا ويجور عليا
في عز إحساسى بضعفي هيكون قلبك عليا
لما اللسان يتقل والكلام يصبح بطىء
و أعيد نفس الكلام أكتر من مرة أرجوك تطيق
يا ما طلبت منى أعيد حكى الحدوتة كتير
و في كل مرة أعيدك قلبى كان بيطير
لما تلاقينى قدمت ومش مواكب عقل جيلك
ما تركنيش لجهلى، علمنى من غير ما أجيلك
خليك عنيا نورلى طريقى لمنتهاه
و إفتكر إنى من علمك معنى الحياة.
لما أبطل أمشى لوحدى خطوتين
لما أكون أضعف إنى أشرب من غير معين
لما تموت الذاكرة وبالعافية أعرف إنت مين
وجودك جنبى كفاية لحد ما يجيلى اليقين
كلمتين هقولهم عندى أغلى من الياقوت
كنت معاك يوم ولادتك
عايزك جنبى يوم ما أموت.
