مدارس المتفوقين stem | ملف كامل كل ما تحتاج معرفته عن هذه المدارس

مدارس المتفوقين stem، الموضوع دا للراغبون مش هيفيدك كستيمر في حاجه عشان ما تضيعش وقتك *
اولا:-كدا يا حلوين في التحفيل اوعي تسمح لحد يحفل عليك مهما كان.. ستيمر مش ستيمر ما تسمحش اللي يحفل عليك أو يضايقك ضايقه انت كمان واعمله بلوك عادي جداً ولا تعمله اعتبار😀 * عشان دي عاده زفت بتتسلم من دفعه لدفعه الا من رحم ربي يعني وعاوزينها تخلص بقا* !
ثانيا:- مفيش سؤال تافه اسال كل اللي عاوزه دا حقك تعرف انت منقول من نظام وداخل ع نظام ثاني وحقك تعرف ادق التفاصيل اسال في اللي عاوزه حتى لو هتسال ع لون الشراب! هتلاقي اللي يجاوبك💚 و معظم اللي بيحفلوا دول لو نزلت في الجروب دا تحت هتلاقي اسالتهم كانت عامله ازاي.. اسال يا بابا براحتك خالص واحنا هنجاوبك💕
ثالثا:- التقديم امتى وازاي وفين؟
التقديم مش وقته دلوقتي التقديم بيبفي في شهر ٧ ازاي بيبفي شويه ورق بيتطبعوا وبتخلصهم وبتقدمهم في الاداره مش في المدرسه تمام! كل التفاصيل هتتعرف أول ما الفورم *استماره * التقديم تنزل وهتلاقي الجروبات كلها اتقلبت”: تابع انت بس وادخل ع الجروب دا ٥ دقائق كل يوم
رابعا:- الشروط بقا انا جايب ٩٨℅ وناقص نصف علوم ونصف رياضه هينفع!؟ ما حدش يعرف.. اللي هيجاوبك هيفتي.. بس تعالو نقول حاجه حلوه.. انت لو جايب أقل من ٩٥℅ ما تنتظرش شروط لان عمر الشروط ما نزلت أقل من كدا.. جايب ٩٨℅ ومقفل مادتين مبروك عليك انت راشق في المدرسه.. طب يعني هما دول بس؟ لا طبعا انا بس باقول الحاجات الموكده💚 أول ما الشروط هتنزل هانزلها هنا بردو أن شاء الله💕
خامسا:- انا نجحت واخدت الاجازه عاوز اجهز نفسي لاختبارات القبول بقا واحل اي كيو وكدا.. انا هبتدي..
ما تبتديش من دلوقتي.. تبتدي من أول شهر سبعه وبردو مع أول شهر سبعه هننزل هنا الحاجات اللي تتذاكر ومعايا لينكات وحاجات متجمعه محتفظه بها هنزلها💕 بس بلاش تضيعوا الاجازه كلها.. عشان لو اتقبلت هتبفي اخر اجازه في حياتك حرفيا💚💔💔😂♥
سادسا:- المدرسه نفسها…بقا حلوه ولا وحشه؟!
بص هي دي اراء شخصيه بس رأيي انا انها حلوه وانك هتستفيد حاجات كتير فعلا * ما تدخلش بمبدأ هادخل لقيتها حلوه هاكمل مش حلوه هاحول* لان انت ببساطه ممكن تتزنق جوا وما تعرفش تحول خد بالك عشان الثانويه الجديده أو ممكن يلغوا قرار التحويل احنا الوزاره بتاعتنا عقيمه”:😂😂
فمن دلوقتي كدا خد قرار إذا كنت هتدخل ولا لا.. طب اييه ادخل ولا لا وايه المميزات وايه العيوب؟
بص يا سيدي هي بتختلف تماما من شخص للتاني بس هاحاول اجمع ١٠ النقط ع السريع كدا
المميزات
١- هتتعلم تعليم نضيف وتعرف أن اللي برا دا مش تعليم
٢- انت كشخص دماغك هيعلى وتفكيرك هيرتقي
٣- هتلاقي نفسك اهتميت بمجالات تانيه واكتشفت مهارات جديده
٤- هتعتمد ع نفسك في كل حاجه
٥- هتعرف حقيقتك فعلا عشان هتنضغط هتعرف شخصيتك الحقيقع عامله ازاي
٦- هتلاقي نفسك ابتديت تفكر في مشاريع في ابحاث في حاجات جديدع*بس مش هتعملك مخترع هي هتوفرلك الظروف بس*
٧- هتلاقي نفسك بتكون علاقات جديده مع كل الناس * هتتعامل مع نجارين وسباكين وحدادين ودكاتره جامعه ومعيدين و…و..و..*
٨- حرفيا هتبني شخصيتك هناك وهتكون ذاتك ومجالك..
٩- هتعرف أن مفيش حاجه صعبه نهائي وان اي حاجه بدايتها بس مجرد فكره
١٠ – هتكتشف مواهب جديده في نفسك ويبفي قدامك مجالات تانيه غير طب وهندسه
*سوري هما وسعوا مني اكتر من ١٠😂 *
١١- هيبفي قدامك فرص للمنح أفضل لان هتلاقي اللي حواليك كلهم بيجروا عليها وبيشوفوها…
١٢- هتلاقي نفسك داخل في مسابقات واولمبياد ومشاريع وابحاث علميه و…و.. وحاجات مش هتسمع عنها برا
١٣- هتتعامل مع ناس عاليه في المجتمع وتعرف شخصياتهم ويمكن تبقوا صحاب.. وهتبفي معرض انك تشوف مشاريع وحاجات وابتكارات تحفه جدا
هتلاقي مميزات تانيه بالنسبه لكل واحد بس دي الحاجات اللي محدش هيختلف عليها 💕
ندخل بقا ع العيوب😂👏🏻
هي هتختلف بردو بس نقول العيوب اللي اتعرضنا ليها كلنا
١- ضغط نفسي بسبب بعدك عن اهلك *حتى لو عامل فيها شبح ووانك مش متعلق بيهم وكدا * هتلاقي نفسك متضايق بردوو بس هتتعود بعد كدا
٢- ضغط شغل ومذاكره ومشاريع والوقت قليل *دي المشكله اللي هتفضل فيها للاخر بس لو بتعرف تنظم وقتك وتحدده وما تضيعوش هتعدي المشكله دي بكل بساطه *
٣- اللغه *المعظم يبفي مدارس حكومي * بص هي بتبفي مشكله لمده اسبوعين تلاته بالكتير بعد كدا الدنيا هتتظبط
٤-الخوف * طبعا انت أول ما تدخل هتحس نفسك أقل واحد في الناس دي كلها وان دول عباقره و..و..و.. لا خالص مع الوقت هتعرف انكو كلكو في نفس المستوي تقريبا وهتلاقي كل واحد مميز في مجال💕
٤- الانطواء هتلاقي نفسك مش قادر تعمل علاقات صحوبيه بين الكل في البدايه لان هتلاقي دماغكو مختلفه جداً بس مع الوقت كل دا هيتغير
٥- العامل النفسي:- هيجي عليك فترات وتسيب كل حاجه وتقعد تعيط”: أو مش هيبفي ليك نفس تعمل اي حاجه.. طبيعي جداً ومع الوقت هتعرف أن دا حاجه وان شغلك حاجه تانيه وهتلاقي نفسك بتذاكر بعين وتعيط بالعين التانيه”:
*مش شايفه عيوب ثاني فهكتفي بكدا *
سابعا بقا:- ادخل المدرسه ولا لا بتختلف من راي شخص للتاني بس رايي انا قدم وادخل هتستفاد جدا💕💕
ثامنا:- التنسييق😂👏🏻👏🏻 ازمه وحوار كل دفعه دي حاجه دفعتكو واخده وضعها فيها يعني هيتعملكو ٤ جامعات.. يبقوا لستيم بس.. القرار نزل والجامعات بتتبني حاليا…
أول ما تتخرج تدخل الجامعات دي.. حتى لو جبت ٥٠℅ هتدخل كليه علوم في الجامعات دي والجامعات دي نضيفه بغباء ومتطوره جداً يعني* ع حسب الصور اللي شوفناها واللي اتقالنا عليها*.. هتبفي انضف جامعات في مصر فدي نقطه ما تخافوش منها نهائي
تاسعا:- يومكو بيمشي ازاي؟
بنصحي الصبح نروح المدرسه من ٧ونصف ل٣ بعدين بتتغدي وبتنام أو بتقعد تذاكر ع حسب وتشتغل للمشروع لحد اليوم ما يخلص ولو عاوز تعمل حاجه اضافيه أو نشاط بتعمل عادي* عندنا الولاد كانوا بيلعبوا كوره بشكل شبه يومي وتحنا كبنات كنا بنهزر عادي يعني الموضوع مش قفش اوي
عاشرا واخيرا ومش هاقول تفاصيل هنا اوي لانها سابقه لاوانها:- المدرسه والدرجات ازاي
اولا عندك حاجه اسمها كابستون دا بيبفي عباره عن مشروع كل ترم *الا في سنه تالته بيبفي مشروع واحد * المشروع دا بتحل مشكله من مشاكل مصر مثلا الطاقه بينطلب منك توفر طاقه أو تشوف حاجه تولد طاقه.. بتبفي انت و٤ من صحابك أو ٣ ع حسبب عددكو.. بتبداو تشوفوا حل وتعملوه وبيبفي متكون من ٤ اجزاء
١- الجورنال:- دا بيبفي امتحان اونلاين كل اسبوعين بيسالك فيه وصلت لحد فين واتعلمت ايه وكدا.. حاجه زي موضوع التعبير كدا
٢- البروتيفوليو:- دا بتكتب فيه كل حاجه خاصه بالمشروع من الالف للياء.. السيره الذاتيه للمشروع زي ما بيقولوا
٣- البوستر:- دا زي لوحه كدا بتتعمل بتلخصوا فيها المشروع بتاعكو كله هنا عشان وانتو بتعرضوا
٤- البروتوتايب:- دا عباره عن الماكيت بتاع المشروع نفسه أو الحاجه اللي اتعملت ما هو مش بيبفي بحث وخلاص لا يعني مثلا لو انت قولت انا هعمل جهاز يحول الطاثه كذا للطاقه كذا البروتوتايب بيبفي عباره عن الجهاز اللي انت عملته دا
و بعد دا كله بقا بيبفي فيه المعرض
دا فيه بيجيلكوا ٣ محكمين بتبداوا تقنعوهم بالفكره بتاعتكم وبيحطولكو درجه…
المشروع دا كله عليه٦٠٪ من المجموع.. حلو طب وال٤٠٪ فين؟!
منهم يا سيدي ١٠٪ اعمال سنه وحضور وغياب وسلوك
كدا فاضل ٣٠٪
دول بيبقوا ع الميدترم والفاينال والعملي بتاع المواد…
حلو عندنا مواد ايه بقا؟
عندك عربي ودين ولغه تانيه (الماني أو فرنسي) وحاسب الي ورياضه وميكانيكا وجغرافيا وتاريخ وكميا وفيزيا واحياء وجولوجيا دا في سنه أولي.. في تانيه بتتشال الجغرافيا والتاريخ وبيتحط مواطنه.. في تالته بقا بيبفي ع حسب تخصصك…علمي علوم ولا علمي رياضه
في النهايه يعني* ستيم مش جنه بس تستاهل العذاب فيها💕💕*
ستيم مش هتخليك عالم ولا زويل الثاني بس هتوفرلك امكانيات لدا.. بس ممكن تلاقي الامكانيات دي برا عادي جداً اللي عاوز ينجح بينجح في اي مكان واي زمان ستيم مش اخر المطاف هي مجرد مرحله مش اكتر وربنا هيعملك الاصح واللي فيه خير ليك💕
عشان الحلوين بقا اخر حاجه…
الزي للولاد تيشرت لبني وبنطلون كحلي
للبنات الزي تيشرت أو شمييز بينك والجيبه أو البنطلون كحلي وخمارك بينك أو كحلي عادي
لون الشرابات اي الوان يا جماعه
الشوز بتاعتك قالوا سمرا في الأول بس طلع عادي يعني *ممنوع الكروكسات * هتتريقوا دلوقتي بعدين لو تطولوا تنزلوا المدرسه بالبيجامه هتنزلوا😂✋🏻
المدرسه بتفضل مفتوحه بعد اليوم الدراسي ومن حقك تقعدي فيها لحد وقت معين عندنا في المنوفيه لحد ١ الفجر.. وفي السكن لحد ٢ بعدها لازم تبقوا في الاوض.. *بيبفي في استثناءات في فترات الامتحانات بس بتختلف من مدرسه للتانيه. *
تمام كدا تقريبا حاولت اغطي كل النقط والاسئله.. والبوست فرد مني شويتين معلش…
كدا فاضل امتحانات القبول والحاجات اللي تذاكروا منها وتاخدوا ايه وانتو رايحين المدرسه ودول سابقين اوانهم وهنزل بيهم بوستس في وقتها أن شاء الله…
اي سوال أو استفسار في الكومنتس تحت💚💕
بالتوفيق يا حلوين💕