كلمات أغنية وقفة ناصية زمان للفنان أحمد مكي

يعود من جديد النجم أحمد مكي ليبهر الجماهير العريضة من محبيه بأغنية جديدة بعنوان وقفة ناصية زمان ويظهر فيها النجم أحمد مكي بشخصية ابن المنطقة الشهم الذي يروي أحداث كثيرة تدور في المنطقة بشكل مقارنة بين الماضي والحاضر والإختلاف الشديد في تصرفات الناس والمجتمع ويخترع مكي لغة جديدة اسمها السغة لمون وهي عبارة عن شفرة لا يفهمها إلا أبناء المنطقة الواحدة

إنت فاكر رمضان، كان الناس بتعلق زينة
و بتحط ساعات نشارة ملونة.
كنت لسة هقولك عليها
و بيجوا بواحد يعمل فريم أبيض بدقيق ولا بجبس ويرسم جوة، ده كان فن.
حبل النور فيشته كانت بتتوزع كل يوم على شقة
إنت فكرتنى بدى كانت رهيبة برضه، أه.
ليها معنى كبير طبعا ماحدش يشيل لوحده.
الطبق إلى دايما طالع نازل في كل شقق العمارة.
أه طبق هو بيجيلك وبيترد وتوديه ويجيلك وتعمل انت حاجة تملاه وتبعته ويرجعلك تانى دى كانت جميلة.
دلوقتى الموتوسيكل يخش ع البنت عليه تلاتة يخشوا ويقلبوا شنطتها، يقلبوها من دراعها وياخدوا منها أى حاجة ممكن يقرصوها أصلا، من غير أى سبب، ولا عملوا حاجة ولا خليوا من الحاجة، زمان البنت وهى مروحة كانت أول ما بتخش المنطقة خلاص كأنها دخلت البيت آمان،
و الدار آمان
فاكرين ولا نقول كمان
وقفة ناصية زمان إدتنا إزاى نملك لسان
موزون بيلاغى الصايع والضايع والجنتلمان
كله سيان، ،
قابلنا كل أنماط جنس الإنسان
وإتعاملنا فإتبنى جوا الدماغ بوصلة وميزان
في جزأ الثانية بنعرف نفقس مين جدع ومين جبان
و مين بقلب مات وأسود ومين قلبه بينبض حنان
و مين تشوفه تقول ده هادى ولو نكشته تشوف جنان
و مين غلبان ومين شيطان وجن وقرد وبهلوان
حتى الشقاوة ع الناصية كان ليها أصول
الخناق راجل لراجل مش راجل قصاد أسطول
كات وصمة عار كبيرة إنك تضرب واحد من الضهر
حصل هيحصلك عار يوصلك للقبر
ماكانش العادى إن القوى بيكسر الأضعف منه
تحس الكل كان مؤمن القوى في الأقوى منه
من أول محترم شقى حتى المجرم كمان
الكلام ده شفته بعينى في وقفة ناصية زمان
كنا عزوة للحتة وقفتنا تحبها
ياما وقفات دلوقتى الناس تتمنى هدها
ألفاظ شمال بصوت عإلى وريحة حشيشها فايحة منها
إزاى ولاد الحتة يبقوا هما مصدر همها
كان يا ما كان وقفة ناصية زمان
وقفة الناصية إتعلمنا فيها كتير لغات
السغة لمون (و هى لغة يتكلم بها البعض في المناطق الشعبية مثل منطقة الطالبية بالهرم) كانت لغة بنرغى بها لساعات
لو في غريب مابينا ومش عاوزين يفهم معنى الحاجات
ساسب حواجب سفهم يتنيل ساجة حالات (حاسب يفهم حاجة )

و في كمان لغات جسد سبيل مثال
دى العيدية، ودى الجيزة فوق الكوبرى، ودى الطالبية.
و دى التلات طوابق إلى ناسها مية مية
و ده الهرم ودى نفض، ودى صبرك عليا
وقفة الناصية كانت زى النادي تمام
إتعلمنا فيها هواية إن كانت كلاب أو حمام
وقت الرغى في الهواية مابيخلصش فيه الكلام
مافيش فلوس عادى برضه مابتموتش الأحلام
عملنا بإيدينا ملعب غية وطبلية وجيم
الحاجة أم الإختراع إسعى إتوكل تتم
ماكانش فيه آيباد تابلت واتساب فيسبوك واكلينلى يومى
يومى كله كان خبرات بشر من فجرى لحد نومى
مش معزول ومنطوى قدام شاشات وبالساعات
وسط ناس ومجتمع بشارك فيه بكتير حاجات
ياما حلينا ع الناصية كتير مشاكل وحوارات
أخد الحق حرفة تبات ولعة تصبح رماد
على وضعك يا عم مكى
يا ليلى يا عين يا ليلى
فاكرين ولا نقول كمان
منطقتى هى الطالبية