اعتاد الساخر الاعلامى باسم يوسف منذ يومين كتابة ” بوست ” على صفحته على موقع الفيس بوك يهاجم فيه النظام ، فبالامس هاجم الرئيس السيسي كما هاجم الجيش ، لكن اليوم يرد على الاتهامات التي يتم توجيهها له من قريب أو بعيد أنه ينتمى لجماعة الاخوان المسلمين، موضحا في مقاله عن مدى كراهيته لهم وأنهم هم السبب الرئيسى فيما يحدث في مصر الآن قائلا في مقاله ما يلى :
تدوينة باسم يوسف على المسلمين والعرب
و الله والله والله انا بحاول اتجنب اجيب سيرتهم. بيفضلوا يستفزوا في الناس ويزايدوا على اللي جابونا وبنحاول نسكت عشان لما بنرد واحد لطيف يطلع يقول :” هو ده وقته؟” “يا عم الضرب في الميت حرام” “المفروض نصطف وما نعضش في بعض” الخ الخ. المشكلة أن حتى الواحد وهو بيتكلم عن النظام الحالي أو بلاويه وبيتجاهلهم خالص ومش بيجيب سيرتهم، بيطلعوله برضه عشان يلوموا الواحد على اللي بيحصل ويقولك انتم السبب وانتم المسئولين الخ الخ. فعلشان كده يظهر أن الواحد لازم يفوقهم كل شوية ويفكرهم بتاريخهم الوسخ مش عشان يعرفوا غلطتهم، لا، البوست ده مش ليهم، لانهم مكابرين ومدعين ومنكرين للمصايب اللي عملوها. لا ده للناس اللي بيتأثروا بكلامهم وبمظلوميتهم وبيصدقوا أن اللي حصل ده غلطة ناس تانية غيرهم وعشان يشوفوا وساختهم ويحطوها قدامهم.
لو انت يا عزيزي منهم ولكنك محترم نفسك وكافي خيرك شرك وعارف أن الكل اخطأ يبقى تعال على جنب شوية، باعتذرلك لو البوست ده طرطش عليك، مش انت المقصود.
نبتدي بالسطر المفضل :”انت كنت السبب في القضاء على التجربة الديموقراطية بسخريتك من مرسي”
لا يا حبيبي، انت فاهم الديموقراطية غلط. الديموقراطية مش منة ولا فضل من مرسي بتاعكم. الديموقراطية هي اللي ليها الفضل انه جه رئيس. والديموقراطية دي هي اللي خلتكم تعيطوا بعد الجولة الاولى لما مرسي اللي كنتم فاكرينه حيكتسح اضطر يخش جولة تانية قدام شفيق. وفضلتم تلفوا على “رفقاء الميدان” واحد واحد وتعيطولهم وتكلموهم وتترجوهم و”النبي تعالوا مؤتمر الفيرمونت” (بعد الانتخابات) بعد لما كنتم بتفشخوهم وبتهاجموهم في برامجكم وتشنعوا عليهم. وبسببهم مرسي كسب بواحد في المية بسبب “عاصري اللمون” اللي زقوه. انا كنت من الناس اللي انتم اتصلتم بيهم واترجتوني اساند مرسي وانا قلت الاتنين اوسخ من بعد مش حعلن تأييدي لحد.
بسبب الديموقراطية يا حبيبي مرسي المفروض كان يتبهدل وينتقد بادب وبقلة ادب. الديموقراطية مش بتخلص عند الصناديق. الديموقراطية بتكمل لبعد كده. اه والديموقراطية فيها شتيمة وسخرية وتأليس عادي. كان المفروض نعمل ايه يعني؟ نسكت؟ نطبل؟ نسكت وشيوخ السلفية الامنجية بيتكلموا عن كرامات مرسي في صلاة الفجر وازاي “نصارى مصر حيدخلوا دين الله افواجا بعد ازالة قبضة الكنيسة الحديدية” نسكت على هبل مرسي والناس اللي مختارهم وتناقضاتهم؟ نسكت على الزبالة اللي كنا بنشوفها في قنواتكم؟ وكمان هو احنا كنا بننتكلم لوحدنا؟ انتم كان عندكم بدل القناة مواقع وصفحات وجريدة وقنوات سلفية في صفكم (الناس، الحافظ، الخليجية وغيرهم). كنتم بتطلعوا في القنوات دي وتنتهكوا حرمات الناس: تتهموا ده بالشذوذ، ده بالكفر وده بالعمالة. وكل ده على فكرة في ظل الديموقراطية اللي كنا كلنا عايشين فيها مش بمنة ولا فضل من مرسي بتاعكم.
اللي حصل بعد كده أن انتم اللي انتهكتوا الديموقراطية دي. لما مرسي قعد مع رؤساء الاحزاب واتصور معاهم وبعدين طلع اعلان دستوري لوحده وبعت ميليشياته للمحكمة الدستورية العليا وحاصرها ووقفت الميليشيات هناك تهتف للداخلية اللي وقفت وما عملتش حاجة.. فاكرين؟ فاكرين ولا نفكركم؟
موضوع بقى أن البرنامج ما حدش قربله وقت مرسي: يا راجل؟ طب هو انا رحت النائب العام اتفسح؟ ست ساعات استجواب وكفالة وعلى قنديل(اللي استضفته في الحلقة) نفس الموضوع. طب ايه رآيكم بقى أن قبل تلاتين ستة وزير الاستثمار الاخواني بتاعكم بعت تحذير مكتوب لكل القنوات أن اي برنامج حيسخر من الرئيس حيتقفل والقناة حتتقفل بعد الانذار التاني؟ الانذار ده اتبعت واحنا بنصور اخر حلقة قبل تلاتين ستة. يعني نيتكم كانت وسخة اصلا.
اللي حصل بقى بعد تلاتين ستة: ما حدش مننا ايد السيسي رئيس جمهورية ولا حد من اللي اعرفهم على الاقل فوضه. وما حدش يقدر يجيب اي حاجة انا قلتها بايده فيها رئيس، بالعكس في عز البرنامج لما كان موقوف وفي ظل تأييد طاغي ليه قلت مش عايزه رئيس جمهورية. احنا فرحنا في تلاتة يوليو، وفرحنا مش عشان نجيب السيسي رئيس، المطالب كانت واضحة: كتابة دستور جديد وانتخابات رئاسية مبكرة، مش قتل الاخوان مش حبس الاخوان مش حبس مرسي، اه يمكن كان مضحوك علينا وما شفناش الوساخة اللي جاية، بس على الاقل انا مش في سلطة، انا كنت بني ادم عادي له رأي وخايف من اللي كان بيشوفه ف يقنواتكم،. صفحاتكم وبرامجكم كانت بتتنتهك عرضي وتجيب في سيرة عيلتي على مدار سنة. معلش مش حقف معاك وانت بترمي عليا وساختك. انا بشر مش ملاك. على الاقل احنا فقنا يا سيدي متاخر لما شفنا الراجل بنضارة القذافي بيطلب تفويض،. عايز تقول اغبيا، سذج؟ ماشي. بس ما تزايدش بقى وتقول اننا تم استخدامنا زي ورق الكلينكس واترمينا. عايز تعرف مين ورق الكلينكس؟ عايز تعرف مين اللي لحسلهم سنة كاملة مش فرح اسبوع؟ تعال يا حبيبي:
السيسي وزير بنكهة الثورة. مين قال دي؟
مين اللي ساند محمد ابراهيم السفاح وهو بيقتل الناس في بورسعيد وانت بتهللوا ليه؟
مين اللي تغاضى عن قتل ٢٦ مصري (مش قبطي) مصري تحت دبابات الجيش اللي انتم كنتم بتعرصوله ومشيتم ساعتها على خطى التلفزيون المصري وجيبتوا اللوم على الضحايا بل واتهمتوهم بالعمالة والتمويل الخارجي.
مين اللي هتك عرض ست البنات، “ايه اللي وداها” هناك و”لابسة عباية بكباسين”، مش خالد عبد الله وضيوفه؟ مش ده السوبر ستار بتاعكم وبتاع تياركم اللي كنتم متحدين فيه مع السلفيين؟ ولو ماوافقتوش على اللي عمله، قياداتكم فضلوا يطلعوا معاه في برنامجه ليه؟
مين صاحب مقولة رجال القوات المسلحة رجال من دهب؟
مين اللي طلع حملة :شغلني مكانه” عشان يقتل أول حركة عصيان مدني واضراب شامل عشان تساندوا المجلس العسكري
مين اللي ساب الناس ينزلوا في التحرير لوحدهم وراحوا يحتفلوا بيوم اليتيم مرة ويوم القدس مرة وسميتوا الجمعة دي جمعة شق الصف ولا جمعة الوقيعة ولا جمعة مش عارف ايه؟
مين اللي جري علـى العرس الديموقراطي وساب بقية الناس تموت في محمد محمود؟
مين اللي دعى لجمعة مساندة المجلس العسكري بتاعة ٢٩ يوليو لمساندة الجيش والمجلس العسكري؟
مين اللي احتمى بعدد السلفيين وشيوخهم الامنجية المعرصين امثال حسان ويعقوب، ودول أول ناس باعوكم، مش كنتم طالعين السما بيهم؟ مش كنتم بتحتفوا بامثال نادر بكار ومخيون؟مش كنتم مبسوطين بأخبار “مجلس العلماء” اللي كانوا بيطلعوا فتاوي وسخة والجيش كان سايبهم؟
مين اللي طلع على الصفحات الاولى من جرايدهم وطالبوا بمكانة خاصة بعيدة عن المسائلة للمجلس العسكري؟
مين اللي طلع في التلفزيون وقال أن شعار يسقط حكم العسكر ده مرفوض؟
مين اللي اتحد مع المجلس العسكري عشان استفتاء ١٩ مارس اللي قلبتوها تصويت على الشريعة وده كان أول مسمار في نعش الثورة.؟
وساختكم اللي شفناها دي مش بس السنتين دول:
شيخكم حسن البنا اللي كان بيمسح جوخ للملك ويعرصله على حساب حزب الوفد
و بعد الثورة كالعادة ركبتوا وكالعادة خدتوا على قفاكم ولو ناسيين (و خصوصا الشباب الصغير) اعملوا بحث لطيف على مقال سيد قطب الشيخ المبجل بتاعكم اللي طالب مجلس قيادة الثورة بذبح خميس والبقري قادة اضراب عمال كفر الدوار وكتب بتاريخ ١٥اغسطس في الأخبار سنة ٥٢:
“ان عهدا عفنا باكمله يلفظ انفاسه الاخيرة في قبضة طاهرة ولكنها قوية مكينة فلا بآس بان يرفس برجليه.و لكنه عهدا قد انتهى، عهدا قد مات ولكن المهم أن نشرع في الاجهاز عليه وان تكون المدية حامية فلا يطول الصراع ولاتطول السكرات، لقد اطلع الشيطان قرنيه في كفر الدوار فلنضرب بقوة ولنضرب بسرعة وليس على الشعب سوى أن يرقبنا ونحن نحفر القبر ونهيل التراب على الرجعية والغوغائية بعد أن نجعلها تشهد مصرعها بعد أن تلفظ انفاسها الاخيرة”
ادي يا عم واحد من اصنامكم بيتكلم عن “العهد العفن” اللي كان الشيخ بتاعه قاعد عند جزمة الملك بتاعه وهوب دبل كيك بيكتب مقال تحريضي من الدرجة الاولى وبيساند “الانقلاب” اللي وصفه ب”القبضة الطاهرة”. نفس القبضة الطاهرة اللي اعدمت عمال كفر الدوار اعدمته هو شخصيا بعديها ب ١٣ سنة. ده ماحدش كتب بالوساخة دي بعد تلاتين ستة.
المشهد ده بيلخص الاخوان عواهر السلطة وعبيد اي نظام. انتم بتتمحلسوا وتتمسكنوا على امل أن العسكر ياخد جانبكم وفي الاخر بتتاخدوا على قفاكم. يعني انتم كلينكس وسخ من زمان. نفس المشهد ده اتكرر كتير قبل كده، ايام مبارك لما كانت المظاهرات تطلع من الجامعة عشان مساندة فلسطين ويبتدي الشباب يهتف “يسقط حسني مبارك” كنتم بتغلوشوا على الهتافات. ولما تلاتين ستة قربت كنت بتتمنوا أن الجيش ياخد صفكم ويوجه مدافعه وبنادقه الناحية التانية. ولو ناسيين نفكركم ببرامجكم قبل بيان ٣ يوليو اللي كان بيعتبر كلام الجيش “تحذير للغوغاء والفوضى” وراجعوا مقالات معسكركم وازاي خيرت الشاطر كان بيعتبر السيسي في جيبه الصغير. نفس خيرت الشاطر اللي كان مبسوط ازاي السيسي متدين وبيصلي الفجر وبيصوم اتنين وخميس. وتيجي تقولي أن احنا كنا سذج وانضحك علينا؟ ادي الطوطم الاعظم بتاعكم أول واحد انضحك عليه. احنا مانجيش حاجة في “عقليته الفذة”.
لما حصل اعتصام مجلس الشورى اللي اتعرت فيه البنت قبليها بيومين وعشان الناس تسخن على المعتصمين عمرو اديب عرض في برنامجه فيديو من كاميرات المراقبة بتاعة المجلس بيوري فيه “الشباب الضايع اللي بيلف سجاير ” عشان يمهد أن الناس دي تتطحن. نفس الفيديو ده بالظبط هو هو اتعرض في قنواتكم وخالد عبد الله حفل عليهم وحرض عليهم وعرض صور خاصة للنشطاء وانتهك عرضهم. نفس الصور والفيديوهات في برامج عمرو اديب وعكاشة نفس نظريات برنارد لويس بتاعة تقسيم مصر نفس التقطيع في التيار المعارض للاخوان كان بيتعرضوا بحذافيره في برامجكم. تفتكروا مين اللي ادى الفيديو ده للبرامج ووزعها عليهم وعنده سيطرة على محيط المجلس وكاميرات المراقبة؟ هه؟
لو كان الامور مشيت الناحية التانية واللي نزلوا قدامكم هما اللي كانوا في مكانكم. كنتم ساعتها حتوصفوا القتلى بشواذ وبشرب الخمر وبممارسة الجنس في الخيام، ودي انتم عملتوها فعلا في في بروفة الاتحادية لان قياداتكم وشيوخكم طلعوا قالوا انهم لقوا كوندومز وازايز خمرة في الخيام.
الايام اللي سبقت ٣ يوليو كان في تحريض في قنواتكم وفي منصة رابعة بالقتل والذبح والتحريض وده كان موجود قدام رئيسكم نفسه
انتم دخلتم البلد كلها في معادلة صفرية وخسرتم. هاردلك يا جماعة معلش، حسبتوها غلط كعادتكم، ما هو اصل ما ينفعش تفتح صدرك وتهدد بالذبح والتفجير والسحق والقتل ولما الدنيا تقلب عليك تيجي تعيط وتتمسكن. كلنا خسرنا بعد كده. يعني الهم طايلني وطايلك ما تطلعوش دين ابونا بقـى. وما تقرفوناش بموضوع اننا اللي اسقطنا مرسي. هو اللي اسقط نفسه بغباوته وبطمع جماعتكم وبخيانة السلفيين ليكم وقلب الجيش اللي كنتم بتلحسوله عليكم، وكنتم على استعداد على انكم تشوفوا الناحية التانية بتتقل عادي.
اللي حصل بعد كده أن الجيش ركب على الكل، سواء عليكم انتم اللي عرصتوله سنة أو على الباقي اللي ما كنش طايقكم وعايزكم تمشوا.
على الاقل انا حاولت وغيري حاول. لمدة ٩ شهور بالرغم من وقف البرنامج مرتين والتشويش عليه مرتين ومحاصرة المسرح تقريبا كل يوم وحكم تحكيم ودعاوي واستنزاف كل يوم، طلعت وسخرت من النظام لغاية لما اتقفلت على الاقل انا قعدت على قد ما اقدر واتكلمت في وقت كان اي حد جوه مصر اتخرس
اما قياداتكم اللي فضلوا يسخنوا الناس في رابعة هربوا على قطر وتركيا من أول قلم وفضلوا يسخنوا من بره برضة ومش هاممهم اي حد يموت. اللي حصل في رابعة انتم تتحملوا جزء منه. مئات الضحايا صدقوا القيادات بتوعكم اللي ولعوا الدنيا وهيجوا الناس وهربوا، وبعدين قاعدين بره قالبين رابعة للطمية كربلائية وبيزايدوا بها على الكل مع أن المفروض انهم يراجعوا اللي عملوه كقيادات سياسية. ولو ناسيين افتكروا اللافتات اللي قلبت انجليزي بتطالب امريكا بالتدخل وفرحتكم لما واحد شيخ عرص طلع يبشر الناس بتحرك الاسطول الامريكي على سواحل مصر، واعلان أن الجيش الثاني انشق وجاي على رابعة يحميهم. كل ده خلى الناس مرابطة على امل زائف وحطهم ف يمواجهة قوة غاشمة في معركة مش متكافئة. ربنا يرحم كل من مات ويجازي اللي حطهم في الموقف ده.
اللي بيزايد عليا ويقول انت بعت وهربت انا لو كنت عايز اقعد في مصر كنت قعدت، وقريب حتسمعوا عن قناة كبيرة جداً القناة دي وراها فلوس كبيرة و”جهة سيادية” اكبر. القناة دي عرضت عليا مبالغ انا عمري ما شفتها ودي كانت ثالث مرة يعرضوا عليا الرجوع :ارجع وقول اللي انت عايزة، بس يكون فيه “تفاهمات””. طبعا رفضت. القناة دي حتعرفوها وحتشوفوا ازاي “قشت” كل البرامج والنجوم اللي في السوق وحتنزل بمجموعة قنوات مش قناة واحدة.
و على فكرة قبل ما تتريقوا على الحتة اللي فاتت، قولوا لقياداتكم لو انا وحش قوي كده ليه عرضوا عليا بدل المرة اربع مرات اني اطلع بالبرنامج من قنواتكم اللي برة؟ مش انا وحش ومساند “للانكلاب”؟
انتم بس لما تفتكروا انكم ديموقراطيين افتكروا الوسخ اللي انت محتمين عنده في تركيا ووساخته مع الصحفيين واي حد بيعارضه حتى لو مالوش علاقة بالجيش والانقلاب اللي حصل. دي عينة من ديموقراطيتكم لما تركبوا. و
مش غريب على وساختكم على مر العصور.
و مادام جبنا سيرته فاردوغان ده على فكرة في حزب الناتو اللي فشخ ليبيا وسوريا والعراق تحت قيادة امريكا اللي مدلعة اسرائيل فبلاش مزايدة في المنطقة دي؟ ماشي؟ بصوا علـى التعاون الامني بينه وبين اسرائيل، مش تبرروله برضه زيكم زي الل بيبرر للسيسي.
و بقولكم اهو وحياتكم وحياتكم وحياتكم لما المصالحة مع الجيش تحصل، حتلحسوا كل وعيدكم بالانتقام، وحتحطوا ايديكم في ايد الجيش ثاني وحتبرروا لقياداتكم وحتنسوا رابعة وحتطلعولها عذر، وحترجعوا في كنف العسكر مرة تانية وتهرسوا الناس اللي في النصف برضة. عملتوها قبل كده وحتعملوها، انتم كده.
تاني، تاني، تاني، انا بحاول اتفاداكم لانكم مش في السلطة دلوقتي بس وحياة النبي ما تطلعوش عينينا بقى وتنسوا نفسكم.
(ملحوظة اخيرة: انا عارف أن البوست ده حيعمل حرقان عند ناس كتير وكالعادة مقالات وبوستات وتعليقات حتنتفض عشان تدافع عن شرف الجماعة، وتشتمني وتتهمني و”تحفل عليا” زي ما حصل بالبوست الاخراني الناحية التانية بتاع الجيش..
فبص بقى يا باشا، انا بقالي خمس سنين ونصف من أول ما طلعت على الانترنت وانا باتشتم بكل انواع الشتايم وباتهم بكل انواع الاتهامات: من أول شتايم بالام والاب للدعوة على اهل بيتي حتى بنتي
الصغيرة للاتهامات باني خاين وعميل، صهيوني، اخوانجي، جاسوس، مجرم قاتل وانقلابي، كلب ساويرس كلب الاخوان، ممول من قطر ممول من تركيا ممول من امريكا اداة للمخابرات، الخ الخ، انا اتعرضت لاطول فترة من ال internet bullying وماعدش يأثر فيا، إلى جانب حملات طويلة في التلفزيون من وسائل اعلام الطرفين، اسلاميين وسيساوية. انا خلاص ما بقاش يأثر معايا، ما بقاش يحوق، الجتة نحست والابتكارات خلصت. كفاية أن جماعة فشيخة بقالها تسعين سنة وسيساوية موالين لنظام عسكري ديكتاتوري بيتفشخوا في دماغهم من حلقة في برنامج أو تويتة أو بوست على الفيس بوك. لو برنامج ساخر بيقدمه “اراجوز” اسقط رئيسكم يبقى رئيسكم تافه وجماعتكم تافهة،.. .و الناحية التانية: لما لسه معرصين النظام بتاعكم بيقضوا اوقات طويلة على التلفزيون والصحف يردوا على “اراجوز” أو يبعتوا ناس ورايا تبوظ حفلاتي أو السفير المصري يحاول يمنع الحفلات دي أو وزير الخارجية نفسه ما يقابلش سياسي لبناني عشان استضاف حفلة ليا ويعني حكومة بحالها حاطة الاراجوز في دماغها، فانتم تافهين زي رئيسكم الممحون بالظبط.
الاراجوز خلاص.. طلع بره خيمة السيرك وبيتفرج عليكم وانتم جوه وهو بياكل فشار.. …و بيضحك. )
و لكن الاعلامى باسم يوسف قد تخطى الحدود في مقالته مع الجميع من مهاجمة النظام الحاكم الآن أو نظام الاخوان البائد،
