لكل زوارنا من خلال موقعنا نجوم مصريه الكرام ولكل عشاق طاجن البطاطس باللحمه النهارده جايب لكم طريقه روعه لعمل هذه الاكله وتعتبر هذا الطبق من الاكلات من انواع الاكل المحبوب والمفضل لدى المستهلك واليكم اجمل واطعم طريقه لعمل طاجن اللحمه بالبطاطس
المقادير: -
كيلو بطاطس
نص كيلو لحمه
كيلو طماطم
توابل
4 بصلات متوسطه
سمن
فلفلتين خضر
صويا صوص
نبدأ الاول باللحمه
دي المقادير اللي عاوزنها في اللحمه
الطبخ: هنحط شويه سمن في حله واللي معندهاش في اي حله تاني و نجيب بصلتين نقطعهم طرنشات و نحطهم علي السمن وهانحط اللحمه بقي و معاها التوابل ولو حابه ممكن تحطى ( كبابه صيبي و توابل لحمه و فلفل اسود و قرفه و جنزبيل و روز ماري)
و نحط الصويا صوص نديها تقلبتين كده لحد ماللحمه تاخد لون حلو
هانضرب 4 طمطمات كده و نكمل بميه و نضفهم علي اللحمه
اول مايغلو نقفل الحله و نسبها ربع ساعه لو حله ضغط لو عاديه يبقي ساعه الا ربع مثلا او يعني تستوي تلت ارباع سوا
بعد الربع ساعه هانضيف بقي الملح و ناخد منهم كبشتين نركنهم هاقولكو ليه وبعدين نسيب الباقي تغلي بيه لحد ماتنشف ونركن اللحمه خلاص وفي نفس الوقت نحضر البطاطس وهانجيب الطاجن بتاعنا و نحط فيه معلقتين سمن و بصلتين طرنشات بردو وعلي السمن هانضرب حوالي نص كيلو طماطم في الخلاط وهانضفهم عليهم هانسبهم تتسبك كويس و نحط الملح و الفلفل الاسود و مكعب مرقه و نرص بقي البطاطس الطرنشات و ناخد الكبشتين اللي من اللحمه ( فاكرينهم ) و نحطهم علي البطاطس عشان تاخد طعم اللحمه و نكمل ميه لحد ماتغطي البطاطس ونسبهم يغلو لحد ماتبقي مستويه نص سوا
هانحط اللحمه من فوق و هانحط طرنشات طماطم و فلفل اخضر
نقفلها بورق فويل و علي الفرن عدل هانسبها حوالي نص ساعه بعدين نشيل الفويل و نشغل الشوايه تاخد وش