ازاى تخلى حمامك نظيف 24 ساعة وبدون اى ارهاق
كتير من الستات بتهمل فى تنظيف الحمام أول بأول وبعدين ترجع تسأل ايه اقوى منطف للحمام سواء للتواليت او البانيو
فنصيحة منى خليكى نظيفة فى بيتك على طول وخصوصاً الحمام
لانك كل شوية هتستخدميه وكل واحد فى اسرتك هيستخدمه والحمام والمطبخ دول عنوان الست سواء نظيفة ام لا و
متعرضيش نفسك لأى موقف محرج لو ضيف جالك فجأة وطلب يدخل الحمام
فهقولك على شوية نصائح هتنفعك بعد كده وهتدعيلى
*اول حاجة خلى فى باسكت صغير كده فى الحمام
*خللى دايما ادوات النضافة فى باسكيت ملون فى الحمام علشان يبقوا تحت ايديكى على طول
*فى مساحات مطاطية هايلة لمسح المياه وتنشيف الارض هاتى واحدة منها علشان اى حد يستحمى على طول يمسح الارض بيها علشان الرطوبة والميا بتعمل عفونة وبكتريا
*قبل ماتنضفى حمامك شغلى الدوش فى الحمام 5 دقايق لحد مايبقى الحمام كله بخار بعدين هاتى ليفة استانلس ومنظف وادعكى حوائط الحمام اوعى تستخدمى سلك المونيوم لانه هيعمل صدأ على السيراميك
*فوق الحوض جنب غسول الوجه والمعجون هاتى اى علبه منظف وجه قديمة وحطى فيها منظف للحمام وخليها فوق الحوض ولما تلاقى الحوض متوسخ علطول تنضفيه اول باول
*التواليت ادعكيه كويس بالفرشاة بتعته مع مطهر قوى وياريت كل ماتلاقى اتوسخ علطول تنضفيه وبكده هتستغنى عن الدعك الكتير والمنظفات القوية
*لمفتاح النور هاتى منديل ورشى عليه برفان وامسحى بيه المفتاح هيرجع يبرق
*متخليش هدوم وراكى فى الحمام اول باول شيليها او تجيبى سبت بغطا فى الحمام علشان الهدوم
*فى ستات كتير بتغسل ملابسها الداخلية وتحطها على منشر مخصص ليها فى الحمام ممكن تعملى كده لو مفيش حمام تانى للضيوف لكن لو حمام واحد متعمليش كده خالص
*التواليت والبانيو ممكن تخليهم يبرقوا حطى الكلور فى بخاخة ورشى بيه عليهم وسيبيهم فترة كده وبعدين اشطفيهم
