كتير من الأباء والأمهات بيسألوا عن موعد ونتيجة تنسيق المدارس التجريبية المميزة والعادية وكمان بيسألو على أسئلة الانترفيو للأبوين والأطفال، وهوا دا موضوعنا النهاردة.
أول حاجة نتيجة تنسيق القبول بالمدارس هتظهر إن شاء الله غداً الأحد الموافق 28/7/2013 من موقع الوزارة ودا عنوانه
وبالنسبة للي هيحصل بعد ظهور النتيجة، هو إننا هنروح المدرسة نقدم الأوراق المطلوبة وندفع المصاريف ونعمل المقابلة الشخصية ودا من بعد ظهور النتيجة وحتى يوم 8/8/2013، وبناخد معانا الطفل لأن المقابلة بتبقى في نفس اليوم بتاع تقديم الأوراق.
طيب بالنسبة لأسئلة المقابلة، دي أمثلة ليها وإن شاء الله متخرجش عنها أسئلة المقابلات بتاعتكم
أسئلة المقابلات للمدارس التجريبية المميزة (المستقبل)
بالنسبة للأطفال
عد من واحد لعشرة بالعربي وبالانجليزي أو عد الحاجات اللي معروضة قدامك دي
اسمك إيه (الرباعي)
مكونات الكمبيوتر (ممكن هما يقولوها بالعربي والطفل يقولها بالانجليزي، يعني الشاشة والكيسة والماوس والكيبورد وكدة)
السؤال عن الألوان
ممكن يبقى فيه بازل بسيط
ممكن يبقى فيه توصيل بسيط (زي أرقام تتوصل بصور، أو حيوانات تتوصل بصغارها)
ممكن لو حافظ سورة صغيرة يسمعها
السؤال عن الأشكال (زي الدائرة أو المثلث، ....)
بالنسبة للأم والأب وبيبقى بالانجليزي
ممكن يطلب من الأب أو الأم تقديم نفسه بشكل عام (يعني نقول الاسم والسن وعدد الأولاد والمؤهل والوظيفة أو ربة منزل) أو توجه له أسئلة زي:
السؤال عن المؤهل (غالباً للأب ومحتمل للأم)
السؤال عن الشغل وبتقضي وقت قد إيه في الشغل (غالباً للأب)
السؤال عما إذا كان عندك أطفال تاني وإيه هواياتهم (غالباً للأم)
السؤال عن ازاي الطفل/الطفلة بتقضي يومها وبيحب إيه (غالباً للأم)
السؤال عما يحدث إذا أخطأ الطفل/الطفلة، وماذا سيحدث إذا تكرر الخطأ مرة تانية (غالباً للأم)
السؤال عما إذا كان الوالدين يضربون الطفل/الطفلة (غالباً للأم)
السؤال عن ممارسة الأب لأي رياضة وما هي وظيفته
السؤال للأم هل الطفل/الطفلة يشعرون بالغيرة تجاه إخوتهم
السؤال عن سبب اختيار المدرسة دي بالتحديد (غالبا للأم)
السؤال عن توقعاتك لطفلك، وازاي بتنميه (غالباً للأم)
--------------------------------------------------------------------------------------
بالنسبة للمدارس التجريبي العادية
الأسئلة بتبقى للطفل بس غالبا ولو اتسأل الأب أو الأم بيبقى عن المؤهل وعدد الإخوة وحاجات بسيطة كدة بالعربي
السؤال عن الألوان زي مثلا لون اللبن إيه؟ أو يشيروا إلى أي حاجة موجودة ويسألوا الطفل عن لونها
ماما اسمها إيه؟
اسم أخوك/اختك إيه؟
ممكن السؤال عن الأشكال
كل اللي بيبقوا عاوزين يعرفوه هل الطفل سليم عقلياً ولا لأ
وفي النهاية أدعوا لكم ولأبناكم بالتوفيق إن شاء الله