بعد خطاب مبارك الثاني اللي "أثلج" قلوب ناس كتيره جدا جدا من الشعب وفهم الشباب الواعي انه كده نجح نجاح كبير في إنه يحقق مطالبه وإنه يكسر حاجز الخوف , وقف البرادعي وأعوانه وقالوا لأ هانفضل موجودين في ميدان التحرير لغايه يوم الجمعه وسموها "جمعة الرحيل" . وهوا بكده فاكر انه بالكام ألف إللي حواليه إنه بيمثل 80 مليون مواطن مصري , وبيدعي إن الشعب "مازال" يريد إسقاط النظام , ويعاونه في ذلك قناه الجزيره اللي اتضحت من خلال موقع ويكيليكس ان قناه الجزيره هي عامل اساسي في مخطط لاسقاط النظام في مصر وزعزعة الامن والاستقرار في البلاد .
من هنا بدأ البلطجيه في النزول للشارع وبالاخص ميدان التحرير ليشق صف المعارضين بالقوه ويريدونها "حرب أهليه " .. من خلال ذلك لاقينا إننا لازم يكون لينا دور لأننا مواطنين في البلد ديه ولازم كلنا نشارك ولازم كل شخص مهما كان يقول رأيه .
عشان كده , لازم نوعي الناس إن خلاص 99% من المطالب اتحققت , ولازم الرئيس اللي احنا بالطبع مش عايزينه يكمل تاني معانا , لازم يفضل في الرئاسه لحين إنتهاء فتره ولايته عشان مايحصلش فراغ سياسي ونغلط الغلطه إللي غلطتها تونس وهما دلوقتي بيضربوا في بعض .
لازم كلنا نقول للخونه واللي ليهم مصلحه من اللي بيحصل دلوقتي مالكمش عيش معانا , أمثال البرادعي وغيره , لازم كلنا نحط إيدينا في إيد بعض بجد عشان نعمر بلدنا ديه من تاني .
قناة الجزيرة بتبث صور حيه عن الاحداث وبتستخدمها كحجه حقيقيه للي بيدعوه ومن ثم بيبدأو في "إثارة" البلبله في صفوفنا وبيوقعوا ما بينا ومن الاخر كده بيسخنوها , عشان طبعا هما المستفيدين , ومن جهة أخري , القناة المصريه المنافقه واللي إتضحت فعلا في الأزمه ديه إنها أكبر قناه كاذبه مخادعه "منافقه" .. تبث صور "غير متحركه" للنيل وتقول : هي ديه مصر يا جماعه مين اللي قالكوا ان فيها مظاهرات وتخريب ومصادمات بين المتظاهرين والامن واخيرا بين المتظاهرين ومن يدعون إنهم مؤيدي لمبارك .. ديه زي الفل اوي اهي !
وبعد خطاب مبارك الثاني اللي إبتز المشاعر والعواطف ولأول مره تبث القناه المصريه أصوات المتظاهرين (المؤيدين) لمبارك وبشكل "مفضوح" لهم ودليل واضح لنا انها لعبه مسيسة , ولا تسلط الضوء إلا عليهم وتتغاضي عن المصادمات التي تحدث في نفس الوقت بين المتظاهرين "الغافلين للحقيقه" والذين يدعون أنهم مؤيدي مبارك والذين هم في الحقيقه البلطجيه (أداه) الداخليه والحزب الوطني وده شئ مش جديد علينا !
لازم كلنا نبقا فاهمين واعيين للي بيجرا حوالينا مش نبقا "معاهم معاهم , عليهم عليهم"
لازم كلنا نبقا مع (الإستقرار) .. غير مؤيدي لأيمن نور ولا البرادعي ولا الاخوان وأمثالهم اللي فاكرين نفسهم أبطال وكل واحد منهم عايز ياخد جزء من الكعكه المطبوخه علي الجاهز من شباب 25 يناير , وغير مؤيدين لمبارك ولا إنه يتولي فتره رئاسية جديده .
لازم ندي فرصه للحكومه الجديده اللي كثير من الشعب متفائل بيها وبالاخص إنها مش حكومه نظيف , لانها دلوقتي بقت حكومه شفيق , اللي الكل يشهد ليه إنه شخص متحمل المسؤلية وشخص عملي للغايه , وكمان هناك فرق بين إن الوزير الفلاني في حكومه نظيف وبين نفس الوزير في حكومه شفيق , وادينا مستنين لما مبارك ينتهي من فتره ولايته ويبدأ عهد جديد من خلال إنتخابات حره نزيهه ونختار من خلالها "خير من يمثلنا" .
لازم كلنا نرفع شعار (نعم للإستقرار .. لا للتخريب .. لا للفوضي .. لا لشماته الأعداء فينا).
نرجوا من الكل أن يتبني هذا الشعار وكما أن ثورة 25 يناير قد أطلقت عبر الانترنت فليس هناك طريق أفضل من إتخاذ الانترنت وسيلة هامه جدا لنشر فكرنا هذا كشباب حر واعي لما يدور حوله .
نرجوا نشر هذا المقال من خلال مواقع الانترنت وبالاخص موقع الفيس بوك , وندعوا الشباب في إنشاء جروب خاص بهذه الحمله .