سالوا جحا عن سر ضحكه !.. قالك اصل اتنين .. وشبكوا !! اللي كان من تحت ميت .. واللي كان من فوق كفيف .. دا شعور سخيـــــــــــــــف ..
وشعور سخيف .. انك تكون رمز الشحاتة .. تبني مبني للشحاتة .. تعمل وزارة للشحاتة ..
يا ساقية دوري عدي فوقي ودوسي .. نصبو عليا وشحتوني فلوسي .. ربطوني فيكي حتي ما اتغميت .. هما اللي فرحوا وحدي انا اتغميــــــت .. انا اللي صاحب البيت .. عايش بدون لزمة .. ولما مرة شكيت .. ادوني بالجزمة ..
مش لاقي تطفح اديك .. هاتولنا و جيبولنا و ادونا ودونا ! هنجيب منين نديك ..
طافح يا بلدي غدايا ولوعتي غدايا .. وادي الاحبة التقوا واتجمعوا عدايا .. انا اللي زارعك دهب .. بتاكليني سباخ .. ما ان كان دا تقل ودلع! .. بزيادة دلعك باخ !..
لا شفت فيكي هنا .. ولا شفت فيكي ترف .. كل اللي فيكي قرف ..
كرامتنا متهانة .. واللقمة باهانة .. بتخلفينا ليه ؟.. لما انتي كارهانا !..
يعني ايه تبقي انتي هبة النيل يا بوبا ؟!.. وكل يوم المية تقطع !!.. يعني ايه لما اشتكي غلو الفاتورة يقولوا تشكي بس تدفع .. لما قش الرز ثروة بتتحرق .. واما نفط الامة ثروة بتتسرق ..
واما جلادك علي ولادك بيبطش .. واما علمك ميلاقيش ياكل فيطفش ..
يعني ايه نرفع ايدينا بالسلام لجل الغزاة .. ويعني ايه لما ابقي ماشي ف حالي اتشد اشتباه .. يعني ايه لما اتحبس اربع سنين حبس احتياطي ..
يعني ايه مش حاسة بالعمر وغلاوته .. بتصبي مر العمر ليه ؟.. دانا كنت هوهبلك حلاوته ..
انا عمري ما اتامرت ولا حطيت شروطي .. ومكان ما ترسي مركبك ببني شطوطي .. انا كنت جيشك لما مماليكك باعوكي .. وكنت يوسف لما عشتي سنين عجاف .. وضلوعي دي اللي ف معركة قادش حموكي .. وشفايفي دي اللي مبطلتش ف يوم هتاف ..
انا كل شبر ف ارضك اتمرمغت فيه .. وكل يوم عشتيه انا اتعذبت بيه .. بتكرَّهيني عيونك السودة وايامي اللي فاتت .. منتيش حبيبتي من النهاردة . حبيبتي ماتت !.. مع صوت ادانك جرس ف الشدة صاحينلك .. من امتي كانوا الحرس هما اللي باقينلك .. بعتيني علشانهم وعنيكي معصوبة .. يا هل تري خاينة ! ولا زيي مغصوبة !!!
كل الكلام اتقال .. والشعر بقي ماسخ .. والصبر علو جبال والظلم شيء رااااااسخ .. وطن وغرقان ف النطاعة ..
علمونا بالعصاية ورضعونا الخوف رضاعة .. علمونا ف المدارس يعني ايه كلمة قيام .. علمونا نخاف من الناظر فيتمنع الكلام .. علمونا ازاي نخاف وازاي نكش .. بس نسيوا يعلمونا الاحترام ..
مستني ايه من طفل ربوه بالزعاق .. غير المشاكل والخناق .. كل اللي بيقولك بحبك ! دول نفاق .. انا لما قلتلك بحبك !! كان نفاق ..
الحب يعني اتنين بيدوا .. مش ايد بتبني وستميت تيت تيت يهدوا ..
الحب حالة .. الحب مش شعر وقوالة .. الحب يعني براح ف قلب العاشقين للمعشوقين .. يعني الغلابة يناموا ف الليل دفيانين .. الحب يعني جواب لكل المسجونين .. هما ليه بقوا مسجونين ؟..
يعني اعيش علشان هدف علشان رسالة .. يعني احس بقيمتي فيكي اني مش عايش عوالة .. يعني لما اعرق تكافئيني بعدالة ..
الحب حالة .. الحب مش شعر وقوالة .. الحب حاجة متتواجدش ف وسط ناس .. بتجيب غداها من صناديق الزبالة .!.!.!.!.
الحب جواكي استحالة ........