الكريدت كار هو عباره عن مبلغ البنك بيستأمن العميل عليه ان يصرف منه و يرحعه للبنك في معاد معين ولو العميل مرجعش المبلغ ده كله في الموعد المحدد بيتراكم عليه فوايد ، في شويه تريكات لو العميل عرفهم هيرتاح جدا من البنك والكارت كمان
1 - لو انت مبتعرفش تتحكم في نفسك و في مشترياتك و لو معاك اي فلوس بتصرفها من غير تفكير يبقى متعملش كريدت كارد
2-الكريدت كارد هيكون صاحبك في الزنقه و يغنيك عن انك تستلف بس الموضوع ده لو انت عارف انك هتدفع الفلوس في معادها لكن لو هطنش ومتتدفعش وتتاخر هتكره نفسك
3- الكريدت كارد هيخليك متشلش فلوس كتير ولو اتسرقت تقدر تكلم البنك وتوقفه
اهم نقطه في الكريدت كارد انك تبقي عارف دوره الدفع بتاعتك ال billing cycle يعني الفاتوره بتطلع يوم ايه واخر موعد للسداد بيكون امتى ولنا هنا وقفه مهمه جدا جدا
-معظم البنوك بتصدر الفاتوره كل شهر وبتديك سماح للسداد خلال 20 يوم يبقى لما تيجي تقدم على كارت اختار دوره الدفع المناسبه لميعاد مرتبك مثلا لو المرتب بينزل يوم 30 يبقى تخلي فاتورتك تطلع يوم 10 او 15 الشهر ليه ؟ عشان اخر موعد دفع بيكون 30 لو الفاتوره طالعه يوم 10 او 5 من الشهر اللي بعده لو الفاتوره طالعه يوم 15 ، و في الحاله دي هتدفع بعد نزول مرتبك لكن لو الفاتوره بتطلع يوم 1 في الشعر مثلا حضرتك هتكون مطالب انك تدفع يوم 20 بالكتير ومرتبك منزلش لسه فها تتاخر وب في غرامه تاخير + فوائد
يبقى احنا اتفقنا ان احسن موعد للفاتوره تطلع يوم 10 والدفع يوم 30 للناس اللي مرتباتها بتنزل اخر اسبوع في الشهر
خدوا الهدية دي وهتدعولي :
لو انت عايز تشتري حاجه غاليه و عارف انك مش هتقدر تدفع تمنها كله من مرتبك اللي جاي بس لما مرتبك التاني ينزل تقدر تدفعها كلها، هتعمل لو الفاتوره مثلا بتطلع يوم 10 يناير انت مطالب تسددها يوم 30 يناير صح ؟ يبقى اي حاجه هتشتريها يوم 9 يناير هتطلع في فاتوره 10 يناير وتدفعها يوم 30 يناير انما لو انت اخرت نفسك يومين واشتريت الحاجه دي يوم 11 يناير هتطلعلك في فاتوره 10 فبراير وتدفعها في يوم 28 فبراير وب هينزلك مرتب يناير و فبراير ..... مش كده؟
يعني الخلاصه خلي مشترياتك التقيله في اول ايام اصدار الفاتوره اللي هي 11 او 12 او 13 لو فاتورتك بتطلع يوم 10
- البنك بيخيرك بمبلغين للدفع يا اما كامل المبلغ اللي عليك او على الاقل 5٪ منه و هنا لازم تبقى عارف البنك بيقبل الحد الادنى ده اللي هو 5٪ من اجمال فاتورتك مش حبا فيك لا عشان حضرتك هتدفع فوايد على المبلغ اللي هي في حدود 2،5 ٪ شهريا يعني 30٪ سنويا ، تخيل !!!!! عشان كده اللي بيدفع الحد الادنى كل شهر بيحس ان المبلغ اللي عليه زي ما هو مبيقلش لان حضرتك ببساطه بتدفع فوايد كتير وجزء صغير من اللي عليك يعني احسن حاجه انك تدفع كل اللي عليك
-البنك بيقولك تقدر تسحب كاش من الكريدت كارد و دي تبقى اكبر غلطه في حياتك لو عملتها لأن في الحاله دي الفوايد عاليه جدا لآنها ببساطه بتحسب فوايد يوميه عليك مش شهريه يعني من الاخر اوعى تسحب كاش منها ولو حصل انك سحبت حاول تدفعهم باسرع وقت ومتستناش موعد فاتورتك
اسف لو طولت عليكم بس الخلاصه لو احنا عرفنا نستخدم الكروت دي صح هتريحكم كتير ولازم كل واحد قبل ما يقدم على كريدت كارد يكون عارف كل حاجه عنها من اول مصاريفها السنويه ،الفايده الشهريه ،غرامه التاخير ،دوره الدفع ودي اهم حاجه
خد بالك لو انت عملت كريدت كارد واسأت استخدامه هيأثر عليك مستقبلا لان البنوك بتسجل الهسيتوري بتاعك ( ماضيك الاسود ) اذا مكنتش منتظم في السداد وكده وكمان بتبلغ بيه البنك المركزي فلو مثلا حضرتك عقلت بعد كده واحتجت خدمه من اي بنك مش هتعرف لان حضرتك في الغالب بتكون بلاك ليست ومفيش بنك هيبوصلك
الكلام ده ممكن ناس كتير تكون عارفاه بس اكيد في ناس برده متعرفوش وانا والله لما كتبته كتبته لوجه الله ومعنديش اي غرض تاني غير توعيه الناس و اتمني لو حد استفاد من اللي انا كتبته يدعيلي بظهر الغيب
و شكرا